لاہور ( این این آئی) مسلم لیگ (ن) کے رہنما و سابق وزیر خواجہ سعد رفیق نے کہا ہے کہ عمران خان کی دوبارہ گنتی رکوانے کے لئے بھاگ دوڑ تھوک کر چاٹنے کے مترادف ہے ،مجھے نئے قانون کے مطابق دوبارہ گنتی کے بنیادی حق سے محروم کر دیا گیا ہے ،واضح ہو گیا کہ دال میں کالا نہیں ساری دال ہی کالی ہے۔ ٹوئٹر پر جاری اپنے بیان میں  سعد رفیق نےکہا کہ حلقہ این اے 131سے عمران خان کو 680 ووٹوں سے جیتا ہوا بتایا گیا تھا ،2835 مسترد شدہ ووٹوں اور صرف پانچ پولنگ سٹیشنز کی

دوبارہ گنتی میں عمران کے 78+39=117ووٹ کم ہو چکے ہیں ۔ ایک دن کی دوبارہ گنتی میں عمران خان کے بوگس ووٹ نکلے تو گنتی رکوانے سپریم کورٹ پہنچ گئے۔ خواجہ سعد رفیق نے کہا ک عمران نے اپنی بوگس کامیابی کی اصلیت خود ہی بتا دی۔انہوں نے کہا کہ عمران کی دوبارہ گنتی رکوانے کے لئے بھاگ دوڑ تھوک کر چاٹنے کے مترادف ہے ، واضح ہو گیا ہے کہ دال میں کالا نہیں ساری دال ہی کالی ہے ، عمران جھرلو وزیر اعظم اور ان کی حکومت جبر اور دھاندلی کی پیداوار ہو گی ۔