اسلام آباد (این این آئی)ترجمان چوہدری نثار علی خان نے چند مخصوص اخبارات میں چوہدری نثار علی خان کے حوالے سے شائع ہونے والی خبروں کو لغو اور بے بنیاد قرار دیتے ہوئے کہا ہے کہ یہ بدقسمتی ہے کہ خود ساختہ خبروں کو معتبر اخبارات کی زینت بنا دیا جاتا ہے اور یہ زحمت بھی گوارہ نہیں کی جاتی کہ متعلقہ شخص سے کسی قسم کی کوئی تصدیق کی جائے۔ایک بیان میں ترجمان نے کہا کہ نہ تو چوہدری نثار علی خان نے میاں نواز

شریف سے ملاقات کی خواہش کا اظہار کیاہے اور نہ ہی انہوں نے میاں شہباز شریف کے ذریعے اس قسم کا کوئی پیغام بھجوایا ہے۔حقیقت یہ ہے کہ ان کا میاں شہباز شریف سے بھی کوئی رابطہ نہیں۔ ترجمان نے اس بات کی بھی تردید کی ہے کہ چوہدری نثار علی خان نے ضمنی انتخابات میں حصہ لینے کا فیصلہ کیا ہے ۔ ترجمان نے کہا ہے کہ چوہدری نثار علی خان نے اس وقت تک الیکشن لڑنے یا نہ لڑنے کا کوئی فیصلہ نہیں کیا۔