اسلام آ با د (آ ئی این پی) پا کستان تحریک انصاف (پی ٹی آ ئی) کے سینئر رہنما نعیم الحق نے کہا ہے کہ مولانا فضل الرحمن بڑے دل کا مظاہرہ کریں اور حلف نہ اٹھانے کا فیصلہ واپس لیں۔اتوار کو میڈیا سے گفتگو میں نعیم الحق نے کہا کہ مولانا فضل الرحمن پاکستان کی بڑی

سیاسی جماعتوں کی طرح مثبت کردار ادا کریں اور اسمبلی سے بائیکاٹ کی باتیں نہ کریں۔انہوں نے مزید کہا کہ پی ٹی آئی مرکز اور پنجاب میں حکومت سازی کا حق رکھتی ہے ،اس لئے رابطے کررہے ہیں۔پی ٹی آئی رہنما نے یہ بھی کہا کہ پنجاب کی حکومت بنانے کیلئے بہت گرما گرمی ہے ،یہاں ہمارے ن لیگ سے زیادہ نمبر ہیں،آج یا کل شام تک سب کچھ سامنے لے آئیں گے ۔ان کا کہنا تھا کہ پنجاب کا وزیراعلی پاکستان تحریک انصاف سے ہوگا اگر دیگر کوئی سیاسی پارٹیاں ہم سے بات کرنا چاہتی ہیں تو کرسکتی ہیں۔نعیم الحق نے کہا کہ کچھ لوگ منفی سیاست کررہے ہیں کیوں کہ وہ بری طرح شکست کھا چکے ہیں،مولانا فضل الرحمن اسمبلی کے بائیکاٹ کی باتیں نہ کریں، دوسری جانب پا کستان تحریک انصاف کے ترجمان فواد چوہدری نے وزارت اعلی پنجاب کے لئے عبدالعلیم خان کی حمایت کردی ہے ۔ اتوار کو سوشل میڈیا پر زیر گردش ویڈیو کے مطابق فواد چوہدری نے بنی گالا میں عبدالعلیم خان سے ملاقات کی اور ان کو گلے بھی لگایا ۔