اسلام آباد (این این آئی) پاکستان تحریک انصاف کے ترجمان فواد چوہدری نے کہا ہے کہ مسلم لیگ (ن) اور پیپلزپارٹی کے فیصلوں سے جمہوریت اور مضبوط ہوگی ، پنجاب میں مسلم لیگ (ق) کی حمایت سے ہمارے پاس اکثریت زیادہ ہے ، مسلم لیگ (ق) ہماری اتحادی جماعت ہے اور ہم انہیں ساتھ لے کر چلیں گے ۔

ہفتہ کو فواد چوہدری نے مسلم لیگ (ن) کے فیصلے پر ردعمل دیتے ہوئے کہا کہ (ن) لیگ کا یہ اچھا فیصلہ ہے ، جمہوریت کے تسلسل میں ہی پاکستان کی سیاسی جماعتوں اور عوام کی بقاء ہے ، مسلم لیگ (ن) اور پیپلزپارٹی نے جو فیصلہ کیا ہے اس سے جمہوریت اور مضبوط ہوگی ، یہ قومی سیاست کا ایک نیا باب شروع ہوا ہے ، دونوں جماعتوں کے اس حلف اٹھانے کے فیصلے سے دوسری جماعتیں جو مسترد کرچکی ہیں ان کی سیاست دفن ہو چکی ہے ، میں مسلم لیگ (ن) اور پیپلزپارٹی کے اس فیصلے کا خیر مقدم کرتا ہوں ، میں امید کرتا ہوں کہ ہم پارلیمان میں مل کر عوام کی خدمت کریں گے ، پنجاب اسمبلی میں حکومت بنانے کے معاملے پر بھی مسلم لیگ (ن) اچھا اقدام کرے گی ، جس طرح مرکز میں پی ٹی آئی کو اکثریت حاص ہے اسی طرح پنجاب میں بھی حاصل ہے ، مسلم لیگ (ق) کی حمایت سے ہمارے پاس اکثریت زیادہ ہے ، مسلم لیگ (ق) نے ہمارے ساتھ سیٹ ایڈجسٹمنٹ کر کے الیکشن لڑا ہے ان کی جو نشستیں ہیں وہ پی ٹی آئی کی نشستیں ہیں ، یہ فیصلہ الیکشن سے پہلے ایک معاہدہ کے تحت ہوا ہے ، مسلم لیگ (ق) کے چار امیدوار ہیں جن کے مقابلے میں پی ٹی آئی نے امیدوار کھڑے نہیں کئے وہ بھی معاہدے کے پابند ہیں ، مسلم لیگ (ق) ہماری اتحادی پارٹی ہے اور ہم انہیں ساتھ لے کر چلیں گے ، حمزہ شہباز شریف نے جو بیانیہ دیا ہے وہ بالکل درست ہے ، پنجاب میں پی ٹی آئی کی اکثریت ہے اور ہم ہی حکومت بنائیں گے ۔