اسلام آباد(آن لائن) پاکستان پیپلزپارٹی نے انتخابات میں دھاندلی کے ثبوت جمع کرنا شروع کر دیئے ہیں۔ اس حوالے سے پارٹی امیدواروں کو ہدایت کی گئی ہے کہ دھاندلی کا ریکارڈ الیکشن سیل کو ارسال کریں ۔ شکایات الیکشن سیل بلاول ہاؤس کراچی کے پتہ پر ارسال کی جائیں۔پاکستان پیپلزپارٹی کے مرکزی سیکرٹری اطلاعات مولا بخش چانڈیونے اس حوالے سے گفتگو کرتے ہوئے کہا ہے کہ ہمارے امیدواروں کے 10 سے 12 ہزار ووٹوں کو مسترد کر کے انہیں ہرایا گیا ہے۔

جہاں جہاں پیپلزپارٹی جیت رہی تھی وہاں وہاں مسترد شدہ ووٹوں کی تعداد تاریخی بنا دی گئی ہے انہوں نے کہا کہ ایک بار پھر چھانگا مانگا کی تاریخ دہرائی جا رہی ہے ایک نااہل شخص جہاز لے کر نو منتخب ارکان کو خریدتا پھر رہا ہے ۔پی ٹی آئی لاکھ کوششوں کے باوجود مثبت نتائج حاصل نہ کر سکی اب خریدو فروخت جہاز چلایا اور ایڑی چوٹی کا زور لگایا جا رہا ہے۔انتخابات سے پہلے پولنگ کے دن اور بعد میں الیکشن کمیشن اپنا کردار ادا کرنے میں بری طرح ناکام ہوا ہے۔