لاہور(آئی این پی ) پاکستان مسلم لیگ (ن) کے رہنما سابق وفاقی وزیر داخلہ احسن اقبال نے کہا ہے کہ 25 جولائی کو عمران خان کے غبارے سے ہوا نکل جائے گی، (ن)لیگ 2013 سے بڑی کامیابی حاصل کرے گی،عمران خان کے یوٹرن لینا ان کی سنجیدگی کا اظہار ہے،جب فیصلے کرلیے جائیں تو یوٹرن نہیں لیے جاتے۔ جمعہ کو لاہور میں میڈیا سے گفتگو کرتے ہوئے احسن اقبال نے کہا کہ (ن) لیگ کی انتخابی مہم عوام چلارہے ہیں،
لیگی حکومت سے پہلے ملک میں بجلی نہیں تھی تاہم عوام اب شکر کرتے ہیں کہ رات کو بجلی آتی ہے۔ انہوں نے کہا کہ (ن) لیگ کے خلاف یکطرفہ کارروائیاں ہورہی ہیں، عوام کی ہمدردیاں مسلم لیگ (ن) کے پلڑے میں آرہی ہیں جب کہ ملک کو ترقی دینے والے کٹہرے میں کھڑے ہیں۔احسن اقبال نے کہا کہ 25 جولائی کو(ن) لیگ 2013 سے بڑی کامیابی حاصل کرے گی، 25 جولائی کو عمران خان کے غبارے سے ہوا نکل جائے گی، عمران خان کے یوٹرن لینا ان کی سنجیدگی کا اظہار ہے، جب فیصلے کرلیے جائیں تو یوٹرن نہیں لیے جاتے۔
