صادق آباد(سی پی پی)علاقہ کے با اثر افراد نے خاوند فوت ہونے کے بعد بیو ہ پر زمین تنگ کر دی‘ جرگہ بلا کربیوہ سے ڈیڑھ لاکھ روپے حاصل کرکے کمسن بچی کا زبردستی نکاح بھی کروا دیا‘دوسرے شخص کی بچی کیساتھ زیادتی کی کوشش‘ اربیلی مائی اپنی والدہ کے گھر آگئی، ملزمان کی طرف سے قتل سمیت سنگین نتائج کی دھمکیاں‘ایڈیشنل سیشن جج نے ایس ایچ او تھانہ احمدپورلمہ سے رپورٹ طلب کر لی ۔تفصیل کے مطابق موضع دڑ ہ
کی رہائشی مائی رانی بیوہ فوج علی نے ایڈیشنل سیشن جج صادق آباد کی عدالت میں درخواست دائر کرتے ہوئے موقف اختیار کیا کہ وہ غریب عورت اور خانہ داری کرتی ہے ، عرصہ چھ سا ل قبل اسکا خاوند فوج علی فوت ہو گیا تو رشید‘ گل حسن پسران خمیسیٰ‘ خمیسیٰ ولد دریان مکھنہ ولد خادم نے مجھ پر زمین تنگ کر دی اور کہا اپنے بچوں کو چھوڑ دو ‘ہم تمہاری کسی دوسری جگہ شادی کر دیتے ہیں ،اگر اپنے بچوں کیساتھ رہنا چاہتی ہوتو ایک لاکھ پچاس ہزار روپے اور ایک بچی کا رشتہ دینا پڑے گا‘ میں بیوہ ، غریب اور بے سہارا عورت تھی اور اپنے بچوں کو کسی صورت نہ چھوڑ سکتی تھی ،خمیسی ٰ ولد دریان نے جرگہ کر کے مجھ سے ایک لاکھ پچاس ہزار روپے لے لیے اور زبردستی میری کمسن بچی اربیلی مائی کا نکاح رفیق احمد ولد خمیسیٰ کیساتھ کر وا دیا‘جس کے بعد وہ میری بیٹی کو اپنے ساتھ لے گئے اور مجھے ڈرایا دھمکایا کہ اگرآواز اٹھائی تو تمہیں اور تمہارے بچوں کو جان سے مار دیں گے ، کچھ عرصہ میری بیٹی رفیق احمد کے گھر مقیم رہی ،جہاں پر ایک رات گل حسن وغیرہ نے اربیلی مائی کیساتھ زبردستی زیادتی کی کوشش کی تو وہ بھاگ کر میرے گھر آگئی ، واقعہ کی درخواست لیکر ایس ایچ او تھانہ احمدپورلمہ اور پھر ڈی ایس پی سرکل پولیس صادق آباد کے پاس گئی مگر پولیس نے کوئی کارروائی نہیں کی ، ملزمان کی طرف سے ہمیں قتل سمیت سنگین نتائج کی دھمکیاں دی جارہی ہیں ۔ جس پر ایڈیشنل سیشن جج محمد آصف سیال نے ایس ایچ او تھانہ احمدپورلمہ سے رپورٹ طلب کر لی ہے ۔
