شیخوپورہ(آئی این پی) وفاقی وزیر امورکشمیر و گلگت بلتستان چوہدری محمد برجیس طاہر نے سانگلہ ہل کے نواحی قصبوں میں ترقیاتی کامو ں کی افتتاحی تقریب سے خطاب کے دوران کہا ہے کہ پیش آمدہ انتخابات میں پاکستان کے عوام ترقی و خوشحالی کا ساتھ دینے کا عزم کیے ہوئے ہیں ، انہوں نے کہا کہ مسلم لیگ ن کے موجودہ پانچ سالہ دور اقتدار پر نظر ڈالتے ہوئے اس امر کا اندازہ لگانا مشکل نہیں ہے ۔
کہ جو ترقیاتی کام مسلم لیگ ن نے ان پانچ سالوں میں کروائے ہیں ان کی پاکستان کی تاریخ میں کوئی مثال نہیں ملتی ، انہوں نے کہا کہ کہ ریکارڈ بجلی کے منصوبے اور ہزاروں کلومیٹر طویل موٹر ویز کی تعمیر و تکمیل صرف اور صرف محمد نواز شریف کی پاکستان سے محبت اور اس کو مستحکم ترقی کی شاہراہ پر گامزن کرنے کے عزم کا نتیجہ ہے ، انہوں نے کہا کہ مسلم لیگ ن کی کوششوں سے پاکستان ترقی کی جس شاہراہ پر گامزن ہو چکا ہے اس سے آج پاکستان سے بغض رکھنے والے ممالک خصوصی طور پر بھارت بھی خائف ہو چکا ہے اور سی پیک کو ناکام بنانے کے لیے آئے روز سازشیں کر رہے ہیں ، انہوں نے کہا کہ ہماری قیادت کی ہمیشہ یہ خواہش رہی ہے کہ پاکستان کو دفاعی اعتبار سے ناقابل تسخیر بنانے کے بعد پاکستان کو معاشی اعتبار سے بھی ناقابل تسخیر بنایا جائے لیکن افسوس اس امر کا ہے کہ نواز شریف کی ملک کے مفاد میں ان تمام کو ششوں کو شروع دن سے ہی سبو تاژکرنے کی کوشش کی گئی اور دھرنوں اور سازشوں کے ذریعے مسلم لیگ ن اور اس کی قیادت کو الجھایا گیا ، انہوں نے کہا کہ ملک کے لیے اس قدر خدمات اور درد رکھنے والے شخص پر پانچ ارب ڈالر بھارت غیر قانونی طریقے سے بجھوانے کے غلط اور بے بنیاد الزامات انتہاء تکلیف دہ اور مایوس کن ہیں ، انہوں نے کہا کہ ایسے بے بنیاد الزامات سے عام شخص کے لیے یہ اندازہ لگانا مشکل نہیں ہے کہ نواز شریف اور مسلم لیگ ن کو دیوار سے لگانے کی کوشش کی جا رہی ہے تاکہ پیش آمدہ انتخابات میں مسلم لیگ ن کو اقتدار کی دوڑ سے باہر کیا جا سکے ۔
