اسلام آباد (مانیٹرنگ ڈیسک)شادی کے موقع پر دولہا ، دلہن اور انکے رشتہ داروں جہاں خوشیاں منانے میں مصروف ہوتے ہیں اور ایسے موقع پر اچانک اگر کوئی واقعہ پیش آجائے تو اچھا بھلا خوشیوں کا ماحول اداسی میں ڈوب جاتا ہے ۔ ایسا ہی ایک واقعہ لاہور کے علاقے رائیونڈ میں پیش آیا جہاں شادی کی تقریب میں دولہے کی دوڑیں لگ گئیں۔ نجی ٹی وی رپورٹ کے مطابق لاہور کے علاقے رائیونڈ روڈ پر نجی شادی ہال میں شادی کی تقریب کے دوران ایک کم سن لڑکا موقع کا فائدہ اٹھا کر شادی ہال میں داخل ہو گیا۔

شادی ہال میں رکھے ایک بیگ میں 15 تولہ سونا اور نقدی پڑی تھی جسے اٹھا کر اس نے نیلے بیگ میں ڈالا اور شادی ہال سے باہر نکل گیا۔سی سی ٹی وی فوٹیج میں دیکھا جا سکتا ہے کہ لڑکا جیسے ہی شادی ہال سے باہر نکلا تو دوڑ لگا دی۔ باہر اس کا ایک اور ساتھی بھی کھڑا تھا جو اسے لے کر فرار ہو گیا۔ عابد نامی شہری نے تھانہ رائیونڈ میں درخواست جمع کرا رکھی ہے کہ مذکورہ لڑکے کو جلد از جلد گرفتار کر کے مال مسروقہ برآمد کیا جائے تاہم ابھی تک کوئی کارروائی نہیں کی گئی۔