اسلام آباد (مانیٹرنگ ڈیسک)گلوکارہ میشا شفیع نے گلوکار و اداکارہ علی ظفر پر جنسی ہراسانی کے الزامات عائد کئے ہیں اور اس معاملے میں کئی نئے انکشافات کے ساتھ شوبز سے تعلق رکھنے والی شخصیات کے علاوہ سماجی شعبوں میں کام کرنے والے افراد بھی کود پڑے ہیں۔ تحریک انصاف کے چیئرمین عمران خان کی سابقہ اہلیہ ریحام خان نے میشا شفیع اور علی ظفر کے تنازعہ میں انٹری دیتے ہوئے اپنے ٹویٹر پیغام میں میشا شفیع کو سراہتے ہوئے کہا ہے کہ مجھے اس باہمت خاتون پر فخر ہے۔ یہ میری راک اسٹار ہے۔
ایسی خواتین کو مزید طاقت ملے جو ایسی شکایتوں یا ایسے رویوں کےخلاف اُٹھ کھڑی ہوتی ہیں۔یہی نہیں ریحام خان نے میشا شفیع کو تنقید کا نشانہ بنانے والوں کو بھی منہ توڑ جواب دیا اور کہا کہ جو عورت اپنے اوپر ہوئے ظلم کے خلاف آواز اُٹھاتی ہے ، اس پر لوگ طرح طرح کے کمنٹس کرتے ہیں۔ اور ایسے لوگ جو اس عورت کو جانتے تک نہیں ہیں، یہ اس بات کا واضح ثبوت ہے کہ کس طرح ہمارے معاشرے میں مظلوم کو چُپ کروا دیا جاتا ہے جبکہ ظلم ڈھانے والے مردوں کو مہذب مرد قرار دیا جاتا ہے۔
