اسلام آباد (این این آئی)وزیراعظم کے معاون خصوصی برائے ریوینیو ہارون اختر نے کہا ہے کہ بڑھتا ہوا کرنٹ اکاؤنٹ خسارہ بڑا چیلنج ہے ٗ پاکستان کے دیگر اعداد و شمار بہتر رہے، نئے مالی سال کے بجٹ میں کوئی نیا ٹیکس نہیں لگے گا ٗ نان فائلز کا ٹیکس ریٹ مزید بڑھایا جائے گا۔انسٹی ٹیوٹ آف چارٹرڈ اکاؤنٹنٹ کے پری بجٹ سیمینار سے خطاب کرتے ہوئے ہارون اختر نے کہا کہ ٹیکس نیٹ بڑھانے کے لئے اقدامات کئے جارہے ہیں۔انہوں نے کہا کہ پر تعیش زندگی گزانے والوں کی

فہرست پر کام جاری ہے ٗدرآمدات بڑھنے اور برآمدات کم ہونے کی وجہ سے کرنٹ اکاؤنٹ خسارے میں اضافہ ہوا۔انہوں نے کہا کہ بجلی کی لوڈ شیڈنگ میں نمایاں کمی ہوئی ہے، پاکستان کی مجموعی قومی پیداوار کی شرح نمو 6 فیصد کے قریب ہے ٗشرح سود کم سطح پر ہونے کے فوائد بھی ملے جبکہ مہنگائی کی شرح بھی کم سطح پر ہے۔ہاروان اختر نے کہا کہ بجٹ میں کوئی نیا ٹیکس نہیں لگایا جائیگا البتہ نان فائلرز کے ٹیکس ریٹ کو مزید بڑھایا جائیگا تاکہ وہ خود فائلر بن جائے اور کم ٹیکس کا فائدہ لے سکے۔