نارووال(آئی این پی)پیپلز پارٹی کے چیئرمین بلاول بھٹو زرداری نے کہا ہے کہ پیپلز پارٹی ملک میں جمہوریت کی محافظ ہے ،سینٹ الیکشن میں کامیابی ہماری بہتر پالیسی کا نتیجہ ہے، اقتدار میں آکر روٹی کپڑا اور مکان کا وعدہ پورا کریں گے۔ ان خیالات کا اظہار انہوں نے گذشتہ رات نور کوٹ نارووال میں ہولو گرام پر عوامی جلسہ سے خطاب کرتے ہوئے کیا۔ بلاول بھٹو زرداری نے کہا کہ آئندہ الیکشن میںملک کو لٹیروں سے نجات دلائیں گے اور الیکشن 2018میں بھرپور کامیابی حاصل کریں گے پیپلز پارٹی تمام طبقات کی نمائندہ جماعت ہے

اور یہ الیکشن جیت کرروٹی ،کُپڑا اور مکان کا وعدہ پورا کرے گی ہمارے پاس غربت کے خاتمے کا مکمل پروگرام ہے ۔ انہوں نے کہا کہ عوام ہمارا ساتھ دیں ملک بھر میں ممبر سازی شروع کر دی ہے۔ عوام کے بغیر کامیابی ممکن نہیں۔ بلاول بھٹو زرداری نے کہا کہ موجودہ حکومت نے ملک کو مسائل کی دلدل میں دھکیل دیا۔ پیپلز پارٹی کی آمریتوں کے خلاف جدوجہد کی طویل تاریخ اور شہادتیں ہیںپیپلز پارٹی ہی ملک کو لٹیروں سے نجات دلائیگی۔ اس موقع پر پیپلز پارٹی کی رہنما ظل ہما ، ڈاکٹر شہزاد زبیر اور دیگر رہنماء بھی موجود تھے۔