اسلام آباد(مانیٹرنگ ڈیسک )شہر قائد کراچی میں پولیس نے آئس نشے کے کاروبار سے منسلک ایک ملزم گرفتار کرلیا جو امریکا سے اعلیٰ تعلیم یافتہ اور اچھے خاندان سے تعلق رکھتا ہے۔ایس ایس پی ساؤتھ سرفراز نواز کے مطابق گرفتار ملزم کا نام عدیل عرف وکی ہے جس نے امریکا سے ماسٹرز کیا ہوا ہے۔ملزم سے آئس کا نشہ اور اسے استعمال کرنے کے لیے درکار آلات برآمد کرلیے گئے ۔دوران تفتیش ملزم نے بتایا کہ اس کا پورا خاندان امریکا
میں ہے اور وہ اعلیٰ تعلیم یافتہ ہے، ملزم پورا نیٹ ورک فیس بک کے ذریعے چلا رہا تھا۔ایس ایس پی سرفراز نواز نے بتایا کہ ملزم پاکستان میں کاروبار کرتا تھا اور کچھ عرصہ پہلے قتل کے مقدمے میں جیل گیا تھا، جیل میں عدیل کو منشیات کی عادت پڑی اور پھراس نے نشہ آور اشیاء کی فروخت بھی شروع کردی۔ایس ایس پی ساؤتھ کے مطابق ملزم سے آئس خریدنے والوں کی تعداد سینکڑوں میں ہے اور اس کے خریداروں میں 50 فیصد لڑکیاں شامل ہیں۔اس نشے کی پہنچ تعلیمی اداروں تک بھی ہے جس کے تدارک پر کام جاری ہے، تفتیشی حکام کے مطابق تین سے چار بار آئس لینے سے اس نشے کی لت پڑ جاتی ہے، لت پڑنے کے بعد جو آئس خرید نہیں پاتا اسے سپلائر بنادیا جاتا ہے۔سپلائر بننے والوں میں نوجوان لڑکے اور لڑکیاں شامل ہوتی ہیں۔ تفتیشی حکام کا کہنا ہے کہ اس نشے کے حصول کے لیے نوجوان لڑکیاں جسم فروشی تک پر آمادہ ہوجاتی ہیں۔پوش علاقوں میں اب تک آئس کے 50 سے 60 ڈیلرز کی نشاندہی ہوچکی ہے اور حکام کا دعویٰ ہے کہ شہر کے بیشتر ڈی جیز اور پارٹی گرلز بھی آئس کی سپلائی میں ملوث ہیں جبکہ شہر میں آئس زیادہ تر پشاور اور کوئٹہ کے راستے لائی جاتی ہے۔ملزم سے دوران تفتیش مزید سنسنی خیز انکشافات کی توقع ہے۔
