اسلام آباد (مانیٹرنگ ڈیسک ) نجی ٹی وی اے آر وائی نیوز کے اینکر اقرار الحسن سے شاید ہی کوئی پاکستانی ایسا ہو گا کہ جو واقف نہ ہو ، اقرار الحسن اپنے پروگرام’’سر عام ‘‘کے ذریعے جہاں سماج دشمن عناصر کی سرکوبی کیلئے سرگرم عمل رہتے ہیں وہیں خدمت خلق کیلئے ان کی کوششیں اب پاکستان کی سرحدوں سے باہر نکل کر پوری دنیا میں مظلوموں کی آواز بنتی جا رہی ہیں۔
تازہ ترین اطلاعات کے مطابق اقرار الحسن شام میں جاری خانہ جنگی سے متاثرہ شامی پناہ گزینوں کی مدد کیلئے شام پہنچ چکے ہیں۔ شام سے آمدہ اطلاعات کے مطابق شام میں بمباری جاری ہے ۔اور اس بمباری کے نتیجے میں روزانہ سینکڑوں مسلمان شہید ہو رہے ہیں۔سماجی رابطے کی ویب سائٹ ٹویٹر پر ٹویٹ کرتے ہوئے اقرار الحسن کا کہنا تھا کہ میں اس وقت شام جا رہا ہوں۔اس بات میں کوئی شک نہیں کہ اس وقت شام میں خانہ جنگی جاری ہے لیکن حلب کے پناہ گزینوں اور ان کے بچوں کوہماری ضرورت ہے۔خیال رہے کہ اس سے پہلے اقرار الحسن برما کا بھی دورہ کر چکے ہیں جہاں سے انہوں نے دنیا کے سامنے روہنگیا مسلمانوں پر ڈھائے جانے والے مظالم کی واضح تصویر پیش کی تھی۔واضح رہے کہ شام میں ہونے والے مظالم نے پوری دنیا کو ہلا کر رکھ دیا ہےاور بشار الاسد اور روسی فوج کی جانب سے تازہ کارروائی میں شہر غوطہ میں شدید بمباری کے نتیجے میں مرنے والے بچوں، عورتوں اور مردوں کی تعداد ہزاروں تک پہنچ چکی ہے جبکہ حلب کو کھنڈر کا ڈھیر بنانے کے بعد اب شامی فوج غوطہ کا قبضہ حاصل کرنے کیلئے شہری آبادی پر بے دریغ بھاری بمباری کر رہی ہے ۔ سلامتی کونسل میں بھی اس ظلم کا مقدمہ درج کیا جا چکا ہے جبکہ گزشتہ روز امریکہ بھی شام پر حملے کا واضح عندیہ دے چکا ہے ۔
