کوئٹہ (این این آئی )مسلم لیگ (ن) سے تعلق رکھنے والے صوبائی وزرا اور ارکان اسمبلی جو حکومت کی تبدیلی کے موقع پر منحرف ہوئے تھے انہوں نے پیپلز پارٹی سے تعلق رکھنے والے سینیٹ کے نئے امیدواروں کو ووٹ نہ دینے کا فیصلہ کیاہے اس سلسلے میں جلد ہی مسلم لیگ (ن) کے پارلیمانی لیڈر صوبائی وزیر نواب جنگیز خان مری کی صدارت میں پارلیمانی گروپ کا اہم اجلاس منعقد ہوگا جس میں خاص طورپر مسلم لیگ (ن) کے ڈپٹی پارلیمانی لیڈر اور صوبائی وزیرداخلہ میر سرفراز بگٹی سمیت تمام مسلم لیگ (ن) کے
ارکان شرکت کرینگے ۔واضح رہے کہ بلوچستان صوبائی اسمبلی کے ٹوٹل ممبران کی تعداد 65ہے جن میں مسلم لیگ (ن) کے ارکان کی تعداد 21ہے ۔دریں اثناء پا کستان پیپلز پارٹی بلوچستان نے سینیٹ انتخابات کیلئے7 امیدواروں کے نا موں کو حتمی شکل دے دی،ذرائع کے مطابق پیپلز پارٹی کی جنرل نشستوں کے لئے صوبائی صدر حاجی علی مدد جتک،سردار عمر گور گیج ،سید اقبال شاہ ،حیات اللہ درانی، ٹیکنو کریٹ نشست کے لئے روزی خان کاکڑ، خواتین نشستوں کے لئے زرینہ زہری اور سکینہ عبداللہ کے نا موں کو حتمی شکل دے دی ہے امیدوار جلد ہی کاغذات نا مزدگی الیکشن کمیشن میں جمع کروائیں گے۔
