سرگودھا(آئی این پی ) سرگودھا میں نامعلوم افراد کے ہاتھوں دوسرے روز بھی ایک شخص کو سوتے میں ہتھوڑا سے حملہ کر کے قتل کر دیا گیا ۔ تفصیلات کے مطابق چونگی نمبر9 میں زیر تعمیر پلازہ کے غریب چوکیدار محمد خان کو نامعلوم سفاک قاتلوں نے سوتے میں ہتھوڑا سے اس کے سر پر وار کر کے موت کی نیند سلا دیا ۔ واقعہ کی اطلاع ملتے ہی پولیس نے موقع پر پہنچ کر مقتول کی نعش قبضہ میں لیکر پوسٹ مارٹم کے لئے ڈی ایچ کیو ٹیچنگ ہسپتال پہنچا دی ۔ پولیس کے مطابق مقتول سلانوالی کا رہائشی
اور پانچ بچوں کا باپ تھا جو زیر تعمیر پلازہ میں چوکیدار ملازم تھا جس کے ورثاء نے بتایا کہ ان کی کسی کے ساتھ کوئی دشمنی نہ ہے یہاں یہ امر قابل ذکر ہے کہ گزشتہ رات بھی اسی جگہ سے چند گزکے فاصلے پر لاری اڈا میں سرو س سٹیشن کے ملازم خضر حیات کو سر پر وار کر کے قتل کر دیا گیا تھا دونوں وارداتوں میں ایک ہی آلہ قتل استعمال ہونے کے شواہد ملے ہیں جبکہ دونوں واقعات ایک دوسرے سے ملتے ہیں تاہم پولیس تمام پہلوؤں پر غور کر رہی ہے ۔
