لاہور(مانیٹرنگ ڈیسک) وفاقی وزیر قانون زاہد حامد نے ارکان پارلیمنٹ کے حلف نامے سے متعلق ویڈیو پیغام جاری کیا ہے جس میں انہیں حلف نامے کا متن پڑھتے ہوئے دیکھا جا سکتا ہے ۔زاہد حامد کی جانب سے جاری ویڈیو پیغام میں کہا گیا ہے کہ میں زاہد حامد حلفیہ بیان کرتا ہوں کہ میں خاتم النبین حضرت محمد ﷺکی ختم نبوت پر مکمل اور غیر مشروط طور پر ایمان رکھتا ہوں۔او ریہ کہ میں کسی ایسے شخص کا پیرو کار نہیں ہوں جو حضرت محمد ﷺ کے بعد اس لفظ کی کسی بھی مفہوم یا کسی بھی تشریح کے لحاظ سے پیغمبر کا
دعویدار ہو۔ او رنہ ہی میں ایسے دعویدار کو پیغمبر یا مذہبی مسلم مانتا ہوں۔نہ ہی میں قادیانی گروپ ، لاہوری گروپ سے تعلق رکھتا ہوں یا خود کو احمدی کہتا ہوں۔انہوں نے کہا کہ یہ وہ حلف نامہ ہے جو قانون کا حصہ ہے اور آپ یہ بھی جانتے ہیں کہ پاکستان کے آئین نے قادیانی گروپ، لاہور گروپ اور احمدی کو غیر مسلم قرار دیا ہے۔میں مزید کہنا چاہتا ہوں کہ میں حضرت محمد ﷺ سے دلی طور پر محبت کرتا ہوں ۔میں عاشق رسول ﷺ ہوں اور میں اور میری فیملی حضرت محمد ﷺ کی حرمت اورعزت پر اپنی جانیں بھی قربان کرنے کو تیار ہے ۔
