اسلام آباد (مانیٹرنگ ڈیسک)چیئرمین تحریک انصاف عمران خان کے ناقابل ضمانت وارنٹ گرفتاری ایس ایس پی آپریشنز کو موصول ہوگئے ۔ میڈیا رپورٹ کے مطابق الیکشن کمیشن نے توہین عدالت کیس میں مسلسل عدم پیشی پر عمران خان کے ناقابل ضمانت وارنٹ گرفتاری جاری کئے تھے اور اب اس سلسلے میں وارنٹ کی کاپی ایس ایس پی آپریشنز کو بھی موصول ہوگئی ہے ناقابل ضمانت وارنٹ گرفتاری کے متن کے مطابق عمران
خان عوامی نمائندگی ایکٹ کے تحت الیکشن کمیشن کی توہین کے مرتکب ہوئے ہیں اس لئے انہیں 26 اکتوبر کو گرفتار کر کے صبح 10 بجے الیکشن کمیشن میں پیش کیا جائے۔عمران خان کے خلاف وارنٹ گرفتاری پر دو پتے درج ہیں، پہلا پتہ عمران خان کی رہائشگاہ بنی گالہ اور دوسرا پی ٹی آئی مرکزی سیکرٹریٹ کا ہے۔ ذرائع کے مطابق پولیس حکام کا کہنا ہے کہ قانون کے مطابق کارروائی عمل میں لائی جائے گی۔ ذرائع کے مطابق عمران خان کو 26 اکتوبر سے ایک یا دو روز قبل گرفتار کیا جاسکتا ہے۔واضح رہے کہ پندرہ ستمبر کو توہین عدالت کیس کی سماعت کے دوران الیکشن کمیشن نے عمران خان کو ذاتی طور پر پیش ہونے کا حکم دیا تھا تاہم عدم پیشی پر 12 اکتوبر کو ان کے ناقابل ضمانت وارنٹ گرفتاری جاری کئے گئے۔اس کے علاوہ گزشتہ روز اسلام آباد میں عمران خان کی زیر صدارت تحریک انصاف کی سینئر قیادت کے اجلاس کے دوران فیصلہ کیا گیا تھا کہ عمران خان 26 اکتوبر کو رضاکارانہ طور پر الیکشن کمیشن کے سامنے پیش ہوں گے۔ دوسری جانب پاکستان پیپلز پارٹی کے ڈپٹی جنرل سیکرٹری بہرہ مند تنگی نے عمران خان کو مناظرے کا چیلنج دے دیا۔ عمران خان بتائیں چار سالوں میں ایک بھی وعدہ پورا کیا ہو، صوبے میں تین ماہ میں دودھ کی نہریں بہانے کے دعوے ناکام ہوگئے۔پشاور پریس کلب میں پریس کانفرنس سے خطاب میں بہرہ مند تنگی نے تحریک انصاف کے چیئرمین عمران خان کو تنقید کانشانہ بناتے ہوئے کہا سال دوہزار تیرہ سے پہلے عمران نے کہا دوسری پارٹیوں سے بھگوڑے نہیں لونگا لیکن سارے بھگوڑے پارٹی میں جمع کئے،
تین ماہ میں صوبے کو تبدیل کرنے کا دعویٰ کیا لیکن جو دودھ کی نہریں بہانے کا دعویٰ کیا وہ ناکام ہوگئیں،بہرہ مند تنگی کا کہنا تھا کہ عمران نیازی کے قول و فعل میں تضاد ہے،خیبرپختونخو حکومت نے صوبہ میں تین سوپچاس ڈیمز نہیں چکیاں بنائی ہیں،ایجوکیشن،ہیلتھ اور ٹوررازم سمیت تمام محکموں میں کرپشن جاری ہے،انہوں نے کہا کہ شکست زدہ چہرے زداری جیسے نہیں بلکہ عمران خان جیسے ہوتے ہیں۔
