اسلام آباد (مانیٹرنگ ڈیسک) پولیس کو تھپڑ مارنے والے ایڈیشنل ایڈووکیٹ جنرل خاور انعام کو فارغ کردیا گیا، تفصیلات کے مطابق مریم نواز اور کیپٹن (ر) صفدر کی 13اکتوبر کو احتساب عدالت میں پیشی کے موقع پر مسلم لیگ کے وکلا اور پولیس کے درمیان ہونے
والے واقعے پر پنجاب حکومت نے کارروائی کرتے ہوئے ایڈیشنل ایڈووکیٹ جنرل خاورانعام بھٹی کوفارغ کر دیا ہے، خاور انعام بھٹی نے احتساب عدالت میں نیب عدالت میں داخل ہونے کی کوشش میں ڈیوٹی پر موجود پولیس آفیسر کو تھپڑ رسید کر دیا تھا۔ جب یہ وکلاء صبح احتساب عدالت میں نیب ریفرنسز کی سماعت کے لیے پہنچے تو انہیں ناکے پر روک لیا گیا تھا کہ کمرہ عدالت میں جگہ نہیں ہے اس لیے آپ اندر نہیں جا سکتے۔ جس پر ہنگامہ آرائی شروع ہوگئی اور پولیس کے تشدد کی وجہ سے ایک وکیل بھی زخمی ہوگیا، پولیس کے تشدد کے خلاف وکلاء نے شدید ہنگامہ آرائی کی اور عدالتی کارروائی بھی نہ ہونے دی گئی۔ اسی ہنگامے کے دوران ایڈیشنل ایڈووکیٹ جنرل خاور انعام بھٹی نے پولیس انسپکٹر شکیل احمد کو تھپڑ مارا تھا جس پر پولیس آفیسر نے تھانہ رمنا میں پرچہ درج کرا دیا تھا، اس میں زدو کوب کرنے اور کار سرکار میں مداخلت کی دفعات شامل کی گئی تھیں، ابپنجاب حکومت نے ایڈیشنل ایڈووکیٹ جنرل خاور انعام کو فارغ کر دیا ہے۔
