اسلام آباد(مانیٹرنگ ڈیسک)پاکستان تحریک انصاف کے رہنما فیاض الحسن چوہان جو اپنے مدلل اور دبنگ گفتگو کے حوالے سے جانے جاتے ہیں نے پاکستانی نجی ٹی وی اے آر وائی نیوز کے ایک پروگرام میں گفتگو کرتے ہوئے کہا کہ میں گزشتہ کئی دنوں سے بھارتی میڈیا چینلز پر گفتگو کیلئے مدعو کیا جا رہا ہوں ۔ اس دوران میں نے محسوس کیا کہ بھارتی دفاعی تجزیہ کار،

ریٹائر فوجی اور صحافی پاکستان پر حملے کیلئے بہت بے چین ہیں اور ایک جنگی ماحول بنا کر بیٹھے۔ ایسے ہی ایک بھارتی ٹی وی کے ٹاک شو میں میں نے بھارتی صحافی کے سوال کا جواب دیتے ہوئے کہا کہ 50کروڑ بھارتی روزانہ صبح سویرے ٹوائلٹ نہ ہونے کی وجہ سے جو کام ریل کی پٹڑیوں پر جا کر کرتے ہیں تم لوگ شاید اسے سرجیکل سٹرائیک سمجھتے ہو، تم میں اتنی جرأت نہیں کہ پاکستان کو آنکھ اٹھا کر بھی دیکھ سکو۔ فیاض الحسن چوہان کا کہنا تھا کہ انہی بھارتی ٹاک شوز میں پھر ہمارے وزیر خارجہ اور وزیر داخلہ اور سیاستدانوں کے بیانات کو کوٹ کر کے ہمیں ذلیل و خوار کیا جاتا ہےاور کہا جاتا ہے کہ دیکھو ہمارے موقف کی تمہارا یہ فلاں رہنما بھی تصدیق کر رہا ہے۔ ان کا کہنا تھا کہ ہماری مجبوری ہمارے میر جعفر اور میر صادق ہیں، ہمارے مجبوری نا اہل شریف کے حواری ہیں، ہماری مجبوری نا اہل شریف کے خاندان والے ہیں، ہماری مجبوری نا اہل شریف کے ساتھی اچکزئی ہیں، ہماری مجبوری نا اہل شریف کے دوست اسفندیار ولی اور الطاف حسین ہیں، یہ مجبوریاں ہیں جو ہمیں مات دے رہی ہیں۔ اس موقع پر فیاض الحسن چوہان نے وزیر خارجہ خواجہ آصف کوامریکہ میں ان کے بیانات پر آڑے ہاتھوں لیتے ہوئے کہا کہ خواجہ آصف ہمارا کیس کیا جا کر لڑیں گے ،کیا پدی اور کیا پدی کا شوربہ، ان لوگوں سے کسی قسم کی کوئی امید نہ رکھی جائے کیوکہ ان تلوں میں تیل نہیں۔

موضوعات:فیاض الحسن چوہان