اسلام آباد(مانیٹرنگ ڈیسک)نجی ٹی وی دنیا نیوز کو انٹرویودیتے ہوئے پاکستان تحریک انصاف کے چیئرمین عمران خان نے ڈی جی آئی بی کو آڑے ہاتھوں لیتے ہوئے کہا ہے کہ یہ عوام کے ٹیکسوں کے پیسے پر ریاست
پاکستان کی ملازمت کرتے ہیں ۔یہ چار دن ایک کرپٹ ، نا اہل سابق وزیراعظم کے پاس لندن میں کیوں حاضری دینے گئے تھے۔ ڈی جی آئی بی کی نواز شریف سے ملاقات کے بعد کریڈیبلٹی متاثر ہو گئی ہے۔ ڈی جی آئی بی کا کام صرف شریف خاندان ، نوا ز شریف وغیرہ کو سیاستدانوں کے خلاف ثبوت فراہم کرنا ہے، اسی طرح کی 37افراد کی ایک لسٹ بھی منظر عام پر آئی ہے جس سے وہ تو انکار کریں گے مگر وہ لسٹ حقیقت پر مبنی ہے۔ ان کا کام صرف لوگوں کو بلیک میل کرنا ہے ، عام انتخابات سے قبل یہ لوگوں کو بلیک میل کرینگے، اسی طرح کی ایک مثال منڈی بہائوالدین سے ن لیگ کے ایم این اے چوہدری اعجاز کی ہے کہ جب وہ انہیں چھوڑ کر ہمارے ساتھ شامل ہوئے جس دن انہوں نے تحریک انصاف میں شمولیت کا اعلان کیا اس کے اگلے دن ہی ایف آئی اے نے چھاپہ ماردیا، تھوڑی دیر بعد چوہدری اعجاز کو جیل میں ڈال دیا گیا۔ جب وہ ان کے ساتھ دو تین سال رہے تب کیوں ان کے خلاف کارروائی نہیں کی گئی۔ شریف خاندان ایک مافیا ہے اور اس نے لوگوں کو بلیک میل کرنے کیلئے افراد بٹھائے ہوئے ہیں۔ آئی بی بجائے پاکستا ن کی خدمت کرنے کے پنجاب پولیس کا کردار ادا کر رہی ہے۔ہم سب پر ایف آئی آرز کٹی ہوئی ہیں، سارے مخالفین پر مقدمات ہیں، ہم نے تو کسی کے خلاف خیبرپختونخواہ میں انتقامی کارروائی نہیں کی۔
