لاہور(مانیٹرنگ ڈیسک) پاکستان تحریک انصاف ، لاہور کی رہنما نے نجی ٹی وی چینل سے گفتگو کرتے ہوئے کہا کہ گزشتہ روز ہونے والے الیکشن میں مریم نواز نے سرکاری مشینری کا بے دریغ استعمال کیا ہے اور قانون کی کئی سنگین خلاف ورزیاں کی گئی ہیں۔
تحریک انصاف کے کارکنوں کو ہر اک چیز سے منع کیا جاتا رہا اور (ن) لیگ کے لوگ ہمیں تنگ کر نے کے علاوہ ہماری خواتین پر جملے بھی کستے رہے ہیں، ہمارے کیمپوں کی خواتین کو (ن) لیگی مرد کارکنان نے انتہائی غلیظ گالیاں بھی نکالی ہیں، قائد اعظم کی تصاویر والے پیسے ان لوگوں نے زمین پر پھینکے ہیں تاکہ پیسے کیلئے جو ووٹ ڈالنے آئے ہیں وہ یہ اٹھا لیں، ان نوٹوں پر قائد اعظم کی تصاویرہیں اور ’’محمد‘‘ بھی لکھا ہوا ہے، میں نے ابھی دیکھا ہے کہ (ن) لیگ کی جو ووٹنگ پرچیاں ہیں ان کے اوپر اللہ کا نام بھی لکھا ہے اور وہ بھی انہوں نے زمین پر پھینکی ہوئی ہیں۔ دوسری جانب این اے 120 کے الیکشن میں شکست کے بعد تحریک انصاف کی امیدوار ڈاکٹر یاسمین راشد نے کہا ہے کہ ن لیگ نے ضمنی الیکشن میں حکومتی مشینری کا بے دریغ استعمال کیا، جمہوریت کی بنیاد الیکشن ہوتی ہے، این اے 120کی عوام کی بہت مشکورہوں۔ یاسمین راشد نے میڈیا کے نمائندوں سے گفتگو کرتے ہوئے لوگوں اور میڈیا کے نمائندوں کا شکریہ ادا کیا اور کہا کہ ابھی جنگ ختم نہیں ہوئی۔اس موقع پر ان کے ساتھ موجود تحریک انصاف کے مرکزی رہنما اعجاز چوہدری نے اس الیکشن کے خلاف عدالت جانے کا اعلان کر دیا۔ حلقے سے 29 ہزار ووٹوں کی منتقلی پر اعتراض اُ ٹھایا اور انکا کہنا تھا ہم اس الیکشن کا نتیجہ اُسی صورت میں تسلیم کریں گئے جبکہ ان ووٹوں کا فیصلہ نہیں ہو جاتا۔
