راولپنڈی(آئی این پی ) جائیداد ہتھیانے کیلئے خاتون سے زبردستی شادی اورحبس بے جا میں رکھنے کے الزام پرروات پولیس نے سابق ایم این اے فیض ٹمن کوگرفتار کرلیا، راولپنڈی مقامی عدالت نے ملزم کا دو روزہ جسمانی ریمانڈ منظور کر لیا۔ تفصیلات کے مطابق سابق ایم این اے

فیض ٹمن اور ان کے ڈرائیور کو ڈیوٹی مجسٹریٹ قاسم رسول کی عدالت میں پیش کیا گیا۔ پولیس نے ملزم کے دس روزہ جسمانی ریمانڈ کی استدعا کی۔وکیل صفائی نے کہاکہ پولیس مخالفین کے ہاتھوں کٹھ پتلی بن چکی ہے۔ ایف آئی آر میں لگے تمام الزامات بے بنیاد ہیں۔ مدعی مقدمہ اپنے خالہ اور ماموں کے خلاف بھی اسی طرح کی درخواست دے چکی ہے۔عدالت نے ملزمان کو دو روزہ جسمانی ریمانڈ پر پولیس کے حوالے کر دیا۔ میڈیا سے گفتگو میں فیض ٹمن نے معاملے کو سیاسی مخالفین کی کارستانی قرار دے دیا۔فیض ٹمن کے خلاف عائشہ سرفراز نامی خاتون نے تھانہ روات میں درخواست دی تھی کہ ملزم نے اس کی بہن ایمان ملک کو بہلا پھسلا کر نشہ آور ادویات پلا کر جائیداد ہتھیانے کی خاطر شادی کر لی اوربعد ازاں اس پر تشدد کیا۔واضح رہے کہ فیض ٹمن سال 2002 کے عام انتخابات میں آزاد امیدوار کی حیثیت سے کامیاب ہوئے تھے جس کے بعد ق لیگ میں شامل ہوئے۔ بعد میں وفاداریاں تبدیل کرتے ہوئے سال 2008 میں مسلم لیگ ن کے ٹکٹ پر انتخاب لڑا اور اسی نشست سے پھر کامیابی حاصل کی۔2010 میں قومی اسمبلی کی نشست سے استعفی دیا اور 2011 میں پاکستان تحریک انصاف میں شمولیت اختیارکی۔ رواں سال اپریل میں اعلان کیا کہ وہ پھر سے ن لیگ میں شامل ہو رہے ہیں۔