لاہور (این این آئی )پاکستان مسلم لیگ (ن) کے مرکزی رہنما و رکن قومی اسمبلی کیپٹن (ر) محمد صفدر نے کہا ہے کہ عمران خان کو استعمال کیا گیا ہے اور اب ان کی افادیت ختم ہو چکی ہے ، حلقہ 120کے ضمنی انتخاب میں پی ٹی آئی والوں کی ضمانت ضبط ہو جائے گی ۔ ان خیالات کا اظہار انہوں نے رکن پنجاب اسمبلی میاں ماجد ظہور کے دفتر میں گفتگو کرتے ہوئے کیا ۔
اس موقع پر اراکین اسمبلی میاں مرغوب احمد ،شہزاد منشی ،رخسانہ کوکب سمیت کارکنوں کی کثیر تعداد بھی موجود تھی۔کیپٹن (ر) محمد صفدر نے کہا کہ ہم نے اپنی یوتھ کو تیار کیا ہے اور اس کو مزید بہتر اور منظم کرنا ہے ۔مسلم لیگ (ن) کی یوتھ ہماری طاقت ہے اور اس نے ملک کی بقاء کے لئے لڑنا ہے ۔ انہوں نے کہا کہ لاہور کے عوام کو حلقہ 120کا انتخاب مبارک ہو ،یہ تاریخی انتخاب ہوگا اور اس میں جیت مسلم لیگ (ن) کی ہوگی۔ دوسری جانب قومی اسمبلی کے حلقہ این اے 120 لاہور کے ضمنی انتخاب میں حصہ لینے والے امیدواروں کی حتمی فہرست جاری کر دی گئی جس کے مطابق کل 44 امیدوار مدمقابل ہوں گے۔الیکشن کمیشن کی جانب سے مسلم لیگ (ن) کی امیدوار بیگم کلثوم نواز کو ’’شیر‘‘ ،پاکستان پیپلز پارٹی کے امیدوار فیصل میر کو ’’تیر ‘‘ اور پاکستان تحریک انصاف کی ڈاکٹر یاسمین راشد کو ’’بلا‘‘ کا انتخابی نشان الاٹ کیا گیا ہے ۔ اس کے علاقہ سابق چیف جسٹس پاکستان افتخار محمد چوہدری کی ابھرتی ہوئی جماعت پاکستان جسٹس اینڈ ڈیموکریٹک پارٹی کے امیدوار منصف اعوان کو ’’کالا کوٹ ‘‘الاٹ کر دیا گیا۔موو آن پارٹی کی روحی بانو کو ’’شتر مرغ ‘‘کا نشان الاٹ کیا گیا جبکہ پاکستان پیپلز پارٹی ورکر گروپ کی ساجدہ میر کو ’’وکٹری ‘‘کا نشان دے دیا گیا۔
عوامی نیشنل پارٹی کے امیدوار بہادر خان ہوتی کو ’’لال ٹین‘‘، لیگی رہنما اور آزاد امیدوار حافظ نعمان کو ’’لیپ ٹاپ ‘‘جبکہ آزاد امیدوار پرویز گجر کو ’’ہرن ‘‘کا انتخابی نشان دیا گیا ہے۔ریٹرننگ افسر محمد شاہد کے مطابق حلقے میں 220 پولنگ اسٹیشنز اور 573 پولنگ بوتھ بنائے گئے ہیں جبکہ پریزائیڈنگ افسروں سمیت عملے کے تربیتی پروگرام کا آغاز 6 ستمبر سے شروع ہوگا۔محمد شاہد نے بتایا کہ این اے 120میں 10 امیدواروں نے کاغذات واپس لیے
جن میں پیپلز پارٹی کے عزیز الرحمن چن اور زبیر کاردار اور پی ٹی آئی کی عندلیب عباس اور جاسم شریف شامل ہیں۔خیال رہے کہ 2013ء کے عام انتخابات میں قومی اسمبلی کے حلقے این اے 120 سے پاکستان مسلم لیگ (ن) کے محمد نواز شریف کامیاب ہو کر وزیر اعظم منتخب ہوئے تھے، جنہیں سپریم کورٹ نے پاناما پیپرز کیس کا فیصلہ سناتے ہوئے 28 جولائی کو نااہل قرار دے دیا تھا۔جس کے بعد خالی ہونے والی قومی اسمبلی کی نشست این اے 120 لاہور میں ضمنی الیکشن 17 ستمبر کو ہوگا۔
