لاہور (مانیٹرنگ ڈیسک ) پاکستان مسلم لیگ ن کے رہنماء تنویر زمان رندھاوا نے اپنی جماعت کو خیر باد کہتے ہوئے پیپلز پارٹی میں شمولیت اختیار کر لی ہے ۔ انہوں نے یہ اعلان سابق صدر آصف زرداری سے ملاقات میں کیا۔ اس اہم ملاقات میں پی پی پنجاب کے صدر قمر زمان کائرہ اور فیصل آباد ڈویژن کے صدر حسن مرتضیٰ بھی شریک تھے ۔ اس موقع پر تنویر زمان نے آصف علی زرداری کو یقین دلایا کہ وہ اپنی تمام تر صلاحیتیں
پارٹی اور اس ملک کی خدمت کیلئے وقف کریں گے اور کوشش کریں گے کہ ملکی ترقی میں اپنا حصہ ڈال سکیں ۔تنویر زمان اپنی پارٹی چھوڑ کر دوسری پارٹی میں جانے والے پہلے سیاسی رہنما نہیں بلکہ موجودہ حکومت کے دور میں کئی مقبول و معروف رہنمائوں نے اپنی سیاسی جماعتوں کو خیر باد کہا اور نئی جماعتوں سے وابستگی اختیار کر لی ، ان میں کئی نام ایسے تھے جو ایک پارٹی کے بانی کارکنوں میں شامل ہوتے تھے اور کئی ایسے جن کی اپنی پرانی پارٹی کیلئے اہم خدمات تھیں ۔ ان میں پیپلز پارٹی کی فردوس عاشق اعوان کا نام قابل ذکر ہے جو اپنی پارٹی چھوڑ کر تحریک انصاف میں شامل ہوگئیں ، پاکستان پیپلز پارٹی کے سینئر رہنما اور سابق وزیر خارجہ شاہ محمود قریشی نے بھی تحریک انصاف کے جھنڈے تلے پناہ لی ۔مسلم لیگ ن کے سابق وزیر ثقافت شیخ رشید احمد نے پارٹی قیادت سے اختلافات کے بعد اپنی الگ جماعت عوامی مسلم لیگ قائم کیا اور مخالفین کے خلاف علم بغاوت بلند کیا ۔ محترمہ بینظیر بھٹو شہید کی پولیٹکل سیکرٹری ناہید خان نے اختلافات کے بعد پیپلز پارٹی ورکرز گروپ کے نام سے الگ سیاسی جماعت قائم کی ایم کیو ایم کی قیادت سے اختلافات کے بعد اپنی پارٹی چھوڑ کر نئی پارٹی بنانے والوں میں مصطفیٰ کمال کا نام قابل ذکر ہے جنہوں نے پاک سرزمین پارٹی کے نام سے نئی جماعت کا اعلان کیا اور دھڑلے سے اپنی جماعت کے پلیٹ فارم سے متحدہ
قائد کے خلاف بیان بازی کا آغاز کیا ۔ان سیاسی رہنمائوں کے علاوہ اور بھی کئی نام ایسے ہیں جو اپنی پارٹیوں کو چھوڑ کر دوسری پارٹیوں میں جانے کی تیاریاں کر رہے ہیں اور ان کا اعلان بھی جلد متوقع ہے ۔
