اسلام آباد(آئی این پی ) پیمرا نے پی ٹی آئی  کے رکن قومی اسمبلی مراد سعید کے خط کے جواب میں کہا ہے کہ قومی ٹی وی پیمرا کے دائرہ اختیار میں نہیں ۔جمعہ کو مراد سعید کے خط کے جوابی مراسلے میں ریگولیٹر نے پیمرا آرڈیننس 2002ترمیمی ایکٹ 2007کی سیکشن 37(a)کا حوالہ دیا جس کے مطابق: ’’اس آرڈیننس کے احکام موثر ہوں گے باوجود اس کے کہ وہ فی الوقت نافذالعمل کسی بھی دوسرے قانون میں یا کسی معاہدے ،

اقرار نامہ یا کسی دسری دستاویز میں چاہے جو بھی ہو ، شامل کسی امر کے بر عکس ہو ں۔ مگر شرط یہ ہے کہ(a) قومی براڈ کاسٹرز، یعنی پاکستان براڈ کاسٹنگ کارپوریشن کو، پاکستان براڈ کاسٹنگ کارپوریشن ایکٹ 1973 ؁ء (نمبر 32، بابت 1973 ؁ء)کی رو سے منضبط کیا جاتا رہے گا اور پی ٹی وی کارپوریشن اور شالیمار ریکارڈنگ اور براڈ کاسٹنگ لمیٹڈ کمپنی کا اہتمام و انصرام کمپنیات آرڈیننس 1984 ؁ء (نمبر 47مجریہ 1984 ؁ء)کے احکام کے تحت کیا جاتا رہے گا ۔‘‘لہٰذا معزز رکن اسمبلی متعلقہ فورم سے رجوع کر سکتے ہیں۔

موضوعات:پاکستان الیکٹرانک میڈیا ریگولیٹری اتھارٹی مراد سعید