اسلام آباد (مانیٹرنگ ڈیسک) وزیراعظم ہاﺅس میں واپسی کیلئے سابق نا اہل وزیراعظم نواز شریف نے اپنی بیگم کلثوم نواز شریف کو این اے 120 سے الیکشن لڑوا رہے ہیں۔ تفصیلات کے مطابق وزیراعظم ہاﺅس میں آئینی و قانونی طریقے سے واپسی کیلئے بیگم کلثوم نواز کو الیکشن لڑا رہے ہیں چونکہ نواز شریف تین دہائیوں سے کامیاب ہوتے آ رہے ہیں اس لئے بیگم کلثوم نواز کی کامیابی کو یقینی سمجھا جا رہا ہے ۔
17ستمبر کو ضمنی الیکشن ہو جائیں گے اور (ن) لیگی حلقوں کے مطابق جیسے ہی الیکشن کمیشن سے بیگم کلثوم نواز کی کامیابی کا نوٹیفکیشن آئے گا جس کے بعد قومی اسمبلی کا اجلاس متوقع ہے جہاں بیگم کلثوم نواز شریف یقیناً حلف اٹھائیں گی۔ جس کے بعد یہ توقع کی جا رہی ہے کہ وزیراعظم شاہد خاقان عباسی استعفیٰ دے دیں گے شاید اسی وجہ سے انہوں نے اپنی رہائش بھی وزیراعظم ہاﺅس میں منتقل نہیں کی۔ شاہد خاقان عباسی کے استعفے کے بعد وزیراعظم کا عہدہ خالی ہو جائے گا جس کے بعد غالب امکان ہے کہ بیگم کلثوم نواز کو وزیراعظم بنا دیا جائے گا جس کے بعد نااہل سابق وزیراعظم نواز شریف ایک بار پھر وزیراعظم ہاﺅس جانے کے قابل ہو جائیں گے اور وزیراعظم ہاﺅس میں بیٹھ کر ملک چلائیں گے۔ ایسا ہی ایک واقعہ ہمسائے ملک بھارت میں بھی پیش آ چکا ہے جہاں بہار کے وزیراعلیٰ لالوپرشاد یادیو نا اہل ہو گئے تھے جس کے بعد انہوں نے اپنی بیوی کو الیکشن لڑوا کر وزیراعلیٰ منتخب کروایا اور پھر وزیراعلیٰ ہاﺅس میں بیٹھ کر سیاست کرتے رہے۔ ماہرین کے مطابق وزیراعلیٰ شہباز شریف کو وزیراعظم کیلئے آگے نہ لانے میں بھی یہی عمل کار فرما ہے جس کی حتمی منظوری آئندہ ایک دو دن میں متوقع ہے۔
