لاہور( این این آئی)پاکستان مسلم لیگ (ن) خواتین ونگ نے پی ٹی آئی کو خیر باد کہنے والی رکن قومی اسمبلی عائشہ گلا لئی سے اظہار یکجہتی اور عمران خان کے خلاف مظاہرہ کیا ،خواتین کارکنان نے ہاتھوں میں جوتے اٹھا کر عمران خان کے خلاف شدید نعرے بازی کی اورعائشہ گلا لئی کے الزامات کی تحقیقات کا مطالبہ کیا ۔ تفصیلات کے مطابق مسلم لیگ (ن) کی خواتین ونگ کی عہدیدار رابعہ فاروقی کی قیادت میں کارکنوں کی کثیر تعداد نے علامہ اقبال ٹاؤن میں مظاہرہ کیا جس میں عائشہ گلا لئی سے بھرپور اظہا ریکجہتی کیا گیا ۔
(ن) لیگ کی خواتین نے ہاتھوں میں جوتے اٹھا کر عمران خان کے خلاف نعرے بازی کرتے ہوئے رکن قومی اسمبلی کے الزامات کی تحقیقات کا مطالبہ بھی کیا ۔ رابعہ فاروقی نے میڈیا سے گفتگو کرتے ہوئے کہا کہ ہم پہلے ہی کہتے تھے کہ پی ٹی آئی میں خواتین کو عزت نہیں دی جاتی ، عائشہ گلا لئی کے الزامات کوئی پہلا واقعہ نہیں بلکہ ماضی میں اس طرح کے درجنوں واقعات ہو چکے ہیں۔ نہ صرف مسلم لیگ (ن) بلکہ پوری قوم کی خواتین عائشہ گلا لئی کے ساتھ ہیں اور انہیں جرات کا مظاہرہ کرنے پر سلام پیش کرتی ہیں۔ ہمار امطالبہ ہے کہ ان الزامات کی تحقیقات کرائی جائیں اور عمران خان کو اخلاقی کرپشن پر تاحیات نا اہل قرار دیا جائے ۔علاوہ ازیں مسلم لیگ (ن) کی رکن پنجاب اسمبلی حناء پرویز بٹ کی جانب سے عائشہ گلا لئی کے الزامات کی تحقیقات کے مطالبے پر مبنی قرار داد بھی پنجاب اسمبلی میں جمع کروا گئی جس کے متن میں کہا گیا ہے کہ عمران خان کا سیاسی ورکرز خواتین کے غیر مناسب رویہ ناقابل برداشت ہے ، کسی سیاست جماعت کے لیڈر کو ایسی حرکتیں زیب نہیں دیتی، عمران خان کے ایسے گھناؤنے فیل کی شدید مذمت کرتے ہیں ،عائشہ گلا لئی عزت دار خاتون کے الزامات کی تحقیقات ہونی چاہئیں ۔ سپریم کورٹ آف پاکستان سے مطالبہ کرتے ہیں کہ عائشہ گلا لئی کے الزامات کی تحقیقات کی جائیں اور تحریک انصاف کے چیئرمین کے خلاف آئین کے آرٹیکل 62اور 63کے تحت کارروائی عمل میں لاتے ہوئے ان کو نا اہل قرار دیا جائے ۔
