اسلام آباد(آئی این پی)پولیس کا لیکچرار سلمان حیدر کا بیان ریکارڈ کرنے کیلئے ان کے اہلخانہ سے رابطہ سلمان حیدر کے بھائی ذیشان حیدر نے پولیس کوبتایا کہ موجودہ صورتحال میں سلمان حیدر بیان ریکارڈ نہیں کراسکتے،ڈاکٹروں نے سلمان حیدرپربیان ریکارڈ کرنے سے متعلق دبائو ڈالنے سے منع کررکھاہے، ہم قانون نافذ کرنے والے اداروں سے بھی رابطے میں ہیں۔

اتوار کو ایس پی رورل کی طرف سے سلمان حیدر کا بیان ریکارڈ کرنے کیلئے ان کے بھائی ذیشان حیدر سے رابطہ کیا گیا تو ذیشان حیدر کا کہنا تھا کہ سلمان حیدر موجودہ صورتحال میں بیان ریکارڈ کرانے کے قابل نہیں۔انہوں نے پولیس کو بتایا کہ ڈاکٹروں نے کہا ہے کہ سلمان حیدر جب تک خود سے بیان کرنے کیلئے آمادہ نہ ہوں تو اس وقت تک ان سے بیان ریکارڈ کرانے کا اصرار نہ کیا جائے،ذیشان حیدر نے پولیس کو بتایا کہ ان کے اہلخانہ قانون نافذ کرنے والے اداروں سے رابطے میں ہیں اور جب سلمان حیدر بیان ریکارڈ کرنے کیلئے پوری طرح ٹھیک ہوں گے تو پولیس کو آگاہ کردیا جائے گا،انہوں نے پولیس کو اپنی مدعیت میں درج مقدمے پر فوری طور پر ایکشن لینے سے بھی روک دیا ہے۔