اسلام آباد (آئی این پی) سابق وفاقی وزیر سینیٹر مشاہد اﷲ خان نے کہا ہے کہ پاکستان دو سال کے اندر دنیا کے 25 ترقی یافتہ ممالک کی صف میں شامل ہوگا‘ عمران خان کی امریکہ میں دو مزید آف شور کمپنیاں سامنے آچکی ہیں ان کے گرد گھیرہ تنگ ہوچکا ہے۔ منگل کو پارلیمنٹ ہائوس کے باہر میڈیا سے گفتگو کرتے ہوئے انہوں نے کہا کہ آج کی رپورٹ کے مطابق پاکستان ترقی کی دوڑ میں بھارت سے آگے نکل چکا ہے ملکی ترقی کے اعداد و شمار مثبت نظر آرہے ہیں چین پاکستان اقتصادی راہداری منصوبے سے ملکی معیشت مزید مضبوط ہوگی جبکہ منصوبے سے عوام کو روزگار کے مواقع میسر آئیں گے اور غربت کی شرح بھی کم ہوگی انہوں نے کہا کہ پاکستان مسلم لیگ اور وزیراعظم کی کوششوں سے ملک دو سال کے اندر دنیا کے پچیس ترقی یافتہ ممالک میں شامل ہوگا۔
انہوں نے کہا کہ عمران خان یوٹرن کے بادشاہ ہیں صبح کو کچھ اور شام کو کچھ کہتے ہیں۔ کل انہوں نے الیکشن کمیشن میں تحریری طور پر معافی مانگی ہے جبکہ امریکہ میں ان کی دو نئی آف شور کمپنیاں سامنے آچکی ہیں ان کے گرد شکنجہ کس دیا گیا ہے عمران اپنی کمزوری اور خفت مٹانے کے لئے دوسروں پر الزام لگا رہے ہیں۔ انہوں نے کہا کہ عمران خان کے ملازمین کے نام پر لوگوں کے خیرات اور زکوٰۃ کے پیسے ہیں جس پر وہ عیاشیاں کررہے ہیں انہوں نے الیکشن کمیشن میں تین وکیل بدلے انہوں نے شروع میں لوگوں کو گمراہ کیا اب لوگ اصل حقائق جان چکے ہیں۔ انہوں نے کہا کہ عمران خان اپنے آپ پر کوئی قانون لاگو نہیں سمجھتا وہ اپنے آپ کو بالاتر سمجھتا ہے صوبہ کے پی کے میں کوئی ترقی نہیں ہوئی اس لئے کہ وہاں پر کرپٹ لوگ حکومت کررہے ہیں۔ ایک سوال کے جواب میں انہوں نے کہا کہ اگر آئین میں وزیراعظم کو استثنیٰ ہے تو اس میں کوئی حرج نہیں۔

موضوعات:مشاہد اﷲ خان