لاہور(آن لائن ) پاکستان تحریک انصاف کی رکن پنجاب اسمبلی سعدیہ سہیل رانا نے ایک تحریک التوائے کار پنجاب اسمبلی میں جمع کروا دی ہے جس میں کہا گیا ہے کہ نجی اخبار کی خبر کے مطابق پنجاب پولیس میں اربوں روپے کی مبینہ کرپشن کا انکشاف ہوا ہے جبکہ سیاسی شخصیات تحفظ دے رہی ہیں۔ تفصیلات کے مطابق 2011 سے اپریل 2015 تک مختلف کاروائیوں میں 2 ارب روپے کا اسلحہ، منشیات اور نقدی ضبط کی گئی جسے مال خانہ میں جمع کروایا گیا نہ ہی اندراج کیا گیا۔
محکمہ داخلہ پنجاب نے دو سال قبل رپورٹ تیار کی تھی جس پر تاحال کوئی ایکشن نہیں ہوا۔ خبر کے مطابق محکمہ پولیس کو تحفظ فراہم کرنے میں مبینہ طور پر حکومتی ایوانوں میں موجود سیاسی شخصیات شامل ہیں مزید برآں سعدیہ سہیل رانا نے میڈیا کے نمائندوں سے گفتگو کر تے ہوئے کہا کہ حکومت پنجاب ہر سال پنجاب پولیس کو اربوں کے فنڈز اور مراعات دے رہی ہے لیکن محکمہ پولیس کی کارکردگی دن بدن بگڑتی جا رہی ہے پولیس صوبے میں جرائم پر قابو پانے میں بُری طرح ناکام ہے صوبائی دارالحکومت میں کوئی گلی یا سڑک راہزنی اور ڈکیتی سے محفوظ نہیں دن دیہاڑے لوگوں کو لوٹ لیا جاتا ہے۔

موضوعات:پنجاب پولیس کرپشن