ملتان(آئی این پی) پانامالیکس پر پاکستان تحریک انصاف کی عوامی رابطہ مہم آج سے دوبارہ شروع ہوگی۔تحریک انصاف آج 7جنوری کو راجن پوراور ہنگو،کل 8جنوری کو بہاولپوراور 15جنوری کو ڈیرہ غازی خان میں بڑے عوامی جلسے منعقد کرے گی۔تحریک انصاف جنوبی پنجاب کی تنظیموں نے راجن پوراور بہاولپورمیں منعقدہ عوامی اجتماعات کی تیاریاں مکمل کرلی ہیں۔

لعل گڑھ ضلع راجن پور میں آج 7جنوری کو منعقدہ جلسے سے شاہ محمودقریشی خطاب کریں گے ،جبکہ کل 8جنوری کو ڈرنگ اسٹڈیم بہاولپور میں منعقدہ جلسے میں عمران خان سمیت تمام پارٹی قیادت شریک ہوگی۔دریں اثناء تحریک انصاف کے وائس چئیرمین شاہ محمودقریشی نے سماجی رابطے کی ویب سائٹ پر اپنے بیان میں کہا ہے کہ عوامی جلسوں میں کرپٹ حکمرانوں کیخلاف اپنا موقف پیش کریں گے۔ پاناما لیکس پر عوام کے ساتھ ملکرحکمران ٹولے کا احتساب کریں گے۔انہوں نے کہاکہ یہ وقت گھروں میں محدود ہونے کا نہیں بلکہ باہرنکل کر اپنا حق مانگنے کا وقت ہے۔تحریک انصاف کرپشن کے خلاف جنگ لڑ رہی ہے،لڑتی رہے گی۔

موضوعات:پانامالیکس تحریک انصاف