اسلام آباد (مانیٹرنگ ڈیسک)نیب کے پلی بارگین قانون کے خاتمے یا اس میں ترمیم کے لئے تمام پارلیمانی جماعتیں متفق ہوگئیں ہیں۔ مسلم لیگ (ن)، پیپلز پارٹی اور تحریک انصاف نے پلی بارگین قانون کے خاتمے کے لیے علیحدہ علیحدہ بل قومی اسمبلی میں جمع کرا دیئے۔حکومت نے مشترکہ بل لانے کا عندیہ دے دیا۔

ایک نجی ٹی وی کے مطابق نیب کے پلی بارگین قانون کی تشریح تمام پارلیمانی جماعتیں اس طرح کررہی ہیں کہ کرپشن کرو اور پلی بارگین قانون کے ذریعے مک مکا کرو،حکمران جماعت مسلم لیگ (ن)، تحریک انصاف اور پیپلز پارٹی نے پلی بارگینگ قانون کے خاتمے یا ترمیم کے لیے الگ الگ بل قومی اسمبلی میں جمع کرا دیئے، تینوں سیاسی جماعتوں نے اپنے اپنے بل میں تجویز کیا ہے کہ کرپشن کے مکمل خاتمے کے لیے پلی بارگینگ قانون کا خاتمہ یا ترمیم ضروری ہے۔

ذرائع کا کہنا ہے کہ پلی بارگین قانون کے خاتمے کے لیے حکومت نے مشترکہ بل لانے کا عندیہ دیا ہے، حکومت نے اس معاملے پر اسپیکر قومی اسمبلی کو پارلیمانی کمیٹی تشکیل دینے کی ہدایت کی ہے، پارلیمانی کمیٹی پلی بارگین قانون میں ترمیم کے لئے تجاویز تیار کرے گی، جنہیں منظوری کے لئے قومی اسمبلی میں پیش کیا جائے گا۔دوسری طرف چیئرمین نیب قمر زمان چودھری کا کہنا ہے کہ پلی بارگین سے ملزم کو معافی نہیں مل جاتی، اس کے خلاف تحقیقات جاری رہتی ہیں۔سابق صدر پرویز مشرف کے دور میں نیب کو پلی بارگین کا اختیار دیا گیا تھا جس کے تحت ملزم کے پاس آپشن تھا کہ وہ انکوائری کے دوران کسی بھی مرحلے پر رضاکارانہ طور پر رقم واپس کر سکتا ہے جس کے بعد اسے کسی قانونی کارروائی کا سامنا نہیں کرنا پڑتا۔

موضوعات:اپوزیشن پلی بارگین قانون نیب