لاہو ر(این این آئی )وزیراعلیٰ خیبرپختونخوا پرویز خٹک نے کہا ہے کہ مجھے وزیر اعلیٰ ہاؤس جیل لگتی ہے کیونکہ میں ساری عمر کھلی فضاؤں میں پھرتا رہا ہوں۔انہو ں نے کہا کہ گارڈن کالج راولپنڈی میں پر ویز رشید ، شیخ رشیدسے دوستی رہی اور ایچی سن میں عمران خان اور چوہدری نثار سے دوستی رہی ، چوہدری نثار سیاسی معاملات کے ذریعے پرانی دوستی میں خلل ڈالنے کی کو شش کر تے ہیں ، میں نے ان کو کہا بھی ہے کہ سیاست اپنی جگہ ہے اور دوستی اپنی جگہ ہے ،چوہدری نثارمیرے بہت قریبی دوست تھے ، کئی مرتبہ سیاسی اختلافات ہو جا تے ہیں تو بہت ہی انتہاتک پہنچ جاتے ہیں، لیکن میں محسوس نہیں کرتا لیکن وہ محسوس کرتے ہیں ،ہم تو دوست کے ساتھ دوستی نبھانے کی کو شش کر تے ہیں لیکن چوہدری نثار دوستی نبھانے کی کو شش نہیں کر تے ۔انہوں نے کہا کہ پارٹی کی پر زور فرمائش پرہی میں نے بھی میگا پر اجیکٹس بنانے شروع کر دئیے ہیں، اب خیبرپختونخواہ میں بھی آپ کو فلائی اوورز اور انڈرپاسز کثیر تعداد میں نظرآئیں گے ، چند ہی دنوں میں میٹرو بس بھی بننا شروع ہو جائے گی ۔