کراچی (آن لائن ) چیئرمین پیپلز پارٹی بلاول بھٹو زرداری نے کہا ہے کہ پاکستان کو قائد اعظم کے وژن کے مطابق بنائیں گے تاہم جناح کا پاکستان بنانے کیلئے ہم سب کو ملکر کام کرنا ہو گا۔آصف علی زرداری 27دسمبر کو عوام کو زبردست سرپرائز دیں گے اس کیلئے 24 گھنٹے انتظار کرنا ہو گا۔اتوار کے روز بلاول بھٹو زرداری نے قائد اعظم محمد علی جناح ؒ کی یوم پیدائش پر مزار قائد پر حاضری دی ۔پھول چڑھائے اور فاتحہ خوانی کی ۔قبل از یں مزار قائد پہنچنے پر چاق و چوبند دستے نے ان کو گارڈ آف آنر پیش کیا ۔
بلاول بھٹو کے ہمراہ وزیر اعلیٰ سندھ مراد علی شاہ ، ڈپٹی سپیکر شہلا رضا ، منظور وسان ، مولا بخش چانڈیو اور دیگر ارکان سندھ اسمبلی نے بھی مزار قائد پر حاضری دی اور پھولوں کی چادر چڑھائی اور بابائے قوم کیلئے فاتحہ خوانی بھی کی۔مزار قائد پر حاضری کے بعد میڈیا سے گفتگو کرتے ہوئے بلاول بھٹو زرداری نے کہا کہ روشن خیال پاکستان بابائے قوم کا خواب تھا جنہوں نے سیاسی جدوجہد کے ذریعے ہمیں آزادی دلوائی۔ قائد اعظم نے سیاسی جدوجہد کے ذریعے آزادی دلوائی اور ہم ان کے ویژن کے مطابق پاکستان بنائیں گے ،ایک سوال کے جواب میں انہوں نے کہا کہ فاطمہ بھٹو اور ذوالفقار جونیئر میرے خاندان کا حصہ ہیں تاہم کافی عرصے سے انکے ساتھ رابطہ نہیں ہوا۔
’’ہمارے دل کے دروازے ہمیشہ انکے لیے کھلے ہیں۔ اس موقع پر سندھ کے وزیر اعلی مراد علی شاہ نے میڈیا سے گفتگو کرتے ہوئے کہا کہ قائد اعظم کے پاکستان کے حصول کے لئے ہم سب کو اپنا کردار ادا کرنا چاہئے ۔انہوں نے کہا کہ آصف علی زرداری کے پاکستان پہنچنے پر مخالفین پریشان ہیں، ملک بغیر وزیر اعظم کے چل رہا ہے ،ہم عوام کی خدمت کررہے ہیں اور ایک بار پھر پیپلز پارٹی بھاری اکثریت سے حکومت بنائے گی ۔
قبل ازیں پیپلزپارٹی کے چیئرمین بلاول بھٹو نے کراچی کے سینٹ پیٹرک چرچ کا دورہ کیا ۔ مسیحی برادری کو کرسمس پر مبارکباد دی اور اس مناسب سے کیک بھی کاٹا ۔ اس موقع پر خطاب میں چیئرمین پیپلزپارٹی نے کہاکہ سب مل کر قوم کو امن کا گہوارہ بنائیں ۔

موضوعات:زرداری