لاہور(آن لائن) وزیر اعلی پنجاب شہباز شریف کا کہنا ہے کہ اورنج لائن ٹرین چین کا پاکستانی عوام کیلئے عظیم تحفہ ہے جب کہ عوام کو بہترین ٹرانسپورٹ کی فراہمی ہمارا مشن ہے۔وزیراعلیٰ پنجاب شہبازشریف سے چینی ریلوے نورینکو کے جنرل منیجرکی قیادت میں وفد کی ملاقات ہوئی، ملاقات میں اورنج لائن ٹرین کے منصوبے پرپیش رفت اوردیگرامورپربات چیت کی گئی۔وزیراعلی شہبازشریف کا ملاقات کے دوران کہنا تھا کہ اورنج لائن ٹرین چین کا پاکستانی عوام کیلئے عظیم تحفہ ہے
یہ منصوبہ اپنی نوعیت کا منفرد اوربے مثال منصوبہ ہے اورمفادعامہ کے اس عظیم منصوبے پر برق رفتاری سے کام کیا جارہا ہے۔ان کا کہنا تھا کہ منصوبے سے روزانہ لاکھوں افراد مستفید ہوں گے، عوام کو بہترین ٹرانسپورٹ کی فراہمی ہمارا مشن ہے، ٹرانسپورٹ کی سہولتوں کوبہترسے بہتر بنانے کیلئے ہر ضروری اقدام کیا جارہا ہے اورمنصوبہ پاک چین دوستی کی اعلیٰ مثال اورفن تعمیرکا شاہکارہوگا
وزیراعلیٰ نے کہا کہ پاک چین مضبوط دوست اور معاشی پارٹنر ہیں دونوں ملکوں کے درمیان وقت گزرنے کے ساتھ معاشی تعاون بڑھتا جارہا ہے اورنج لائن منصوبہ بھی پاک چین دوستی کا عکاس ہے چائنہ کی نورینکو کمپنی کے جنرل منیجر زوہینگ نے اس موقع پر وزیراعلیٰ پنجاب کو یقین دلایا کہ عوامی مفاد کے اس منصوبے کو مقررہ وقت میں مکمل کرنے میں کوئی کسر اٹھا نہیں رکھیں گے ۔