اسلام آباد(این این آئی)آل پاکستان مسلم لیگ کے چیئرمین جنرل (ر) پرویز مشرف کی ہدایات کے بعد پارٹی راہنماؤں نے اپنی اپنی سطح پر تنظیموں کو فعال کرنا شروع کردیا۔ملک بھر میں ڈویژنل ،ضلعی اور تحصیل سطح پردفاتر قائم ہونا شروع ہوگئے۔کے پی کے اور سندھ کے بعد پنجاب کی ڈویژنل تنظیمیں مکمل کر لی گئیں،گوجرانوالا ڈویژن میں بڑا جلسہ اور دفتر کا افتتاح اتوار کو ہوگا۔ تفصیلات کے مطابق اے پی ایم ایل کے چیئرمین جنرل(ر) پرویز مشرف کی طرف سے پارٹی کو ڈویژنل،ضلعی اور تحصیل سطح پر منظم اور فعال کرنے کی ہدایات کے بعد پارٹی راہنماؤں نے اپنی اپنی سطح پر تنظیمی سرگرمیاں تیز کردی ہیں۔
اس سلسلے میں کے پی کے اورسندھ کے علاوہ پنجاب میں ڈویژنل اور ضلعی تنظیمیں مکمل کر کے پارٹی دفاتر قائم ہونا شروع ہوگئے ہیں۔بہاولپور،ڈیرہ غازی خان،فیصل آباد،ملتان،ساہیوال،سرگودھا اور لاہور ڈویژنز میں تنظیم سازی کی تکمیل کے بعد اتوار کوگجرات میں گوجرانوالا ڈویژن کے دفتر کا افتتاح کیاجائے گا۔اسکے ساتھ ہی پارٹی کے جلسے کا انعقادکیا جائے گا۔پارٹی سیکرٹری جنرل ڈاکٹر محمد امجد دیگر مرکزی قیادت کے ہمراہ اتوار کی صبح جلسے میں شرکت کے لئے روانہ ہوں گے۔ وہ جلسے کے شرکاء سے خطاب اور ڈویژنل دفتر کا افتتاح بھی کریں گے۔
