اسلام آباد(مانیٹرنگ ڈیسک) سپریم کورٹ نے شیخ رشید احمد کی نااہلی کیس کی سماعت 2ہفتے کیلئے ملتوی کر دی۔ میڈیا رپورٹس کے مطابق چیف جسٹس انور ظہیر جمالی کی سربراہی میں قائم 3رکنی بینچ نے اثاثہ جات چھپانے پر شیخ رشید کے خلاف دائر مقدمے کی سماعت کی، عدالت نے شیخ رشید کی غیر حاضری پر برہمی کا اظہار کرتے ہوئے دوبارہ نوٹس جاری کرنے کی ہدایت کی اور سماعت 2ہفتے کیلئے ملتوی کر دی۔
سماعت شروع ہوئی تو شیخ رشید کی غیر حاضری پر عدالت نے رجسٹرار آفس سے استفسار کیا کہ کیا شیخ رشید احمد کو نوٹس جاری کیا گیا تھا جس پر رجسٹرار آفس کی جانب سے جواب دیا گیا کہ شیخ رشید کو نوٹس جاری کیا گیا تھا مگر وہ حاضر نہیں ہوئے۔چیف جسٹس انور ظہیر جمالی نے ریمارکس دیے کہ’’ شیخ رشید نے تو عدالت آنے کی زحمت بھی نہیں کی‘‘ تاہم بعد میں کیس کی تاریخ سے متعلق نوٹس نہ ملنے پر عدالت نے انہیں دوبارہ نوٹس جاری کرنے کی ہدایت کرتے ہوئے سماعت 2ہفتے کیلئے ملتوی کر دی۔
یاد رہے مسلم لیگ نواز کے رہنما شکیل اعوان نے سپریم کورٹ میں درخواست دائر کر رکھی ہے جس میں موقف اختیار کیا گیا ہے کہ شیخ رشید نے الیکشن کمیشن کو پیش کردہ گوشواروں کی تفصیلات میں اپنے اثاثہ جات چھپائے ہیں جس پر انہیں نااہل قرار دیا جائے۔اس سے قبل الیکشن ٹربیونل نے شیخ رشید کے خلاف شکیل اعوان کی درخواست کو خارج کر دیا تھا جس کے بعد انہہوں نے سپریم کورٹ سے رجوع کر رکھا ہے ،کیس کی سماعت چیف جسٹس انور ظہیر جمالی کی سربراہی میں قائم 3 رکنی بینچ کر رہا ہے ، بینچ میں جسٹس امیرھانی مسلم اور جسٹس اعجاز الاحسن بھی شامل ہیں ۔