کراچی (آئی این پی)ڈائریکٹر جنرل ڈیفنس ایکسپو میجر جنرل آغا مسعود اکرم نے کہا ہے کہ دفاعی سامان بنانے میں بتدریج بہتری لارہے ہیں‘ نمائش میں شرکت کرنے والی ملکی و غیر ملکی کمپنیوں اور وفود کا شکریہ ادا کرتے ہیں‘ چار روزہ نمائش کیلئے ملکی اور غیر ملکی سامان حرب و ضرب سجا دیا ‘ ترکی کے جدید طیارے اور ایئر ڈیفنس سسٹم بھی نمائش کو چار چاند لگا رہے ہیں ‘روس کی تین کمپنیاں بھی جدید ترین اسلحے کے ساتھ موجود ہیں۔ وہ منگل کو دفاعی نمائش آئیڈیاز 2016 کی افتتاحی تقریب سے خطاب کررہے تھے۔ اس موقع پر ڈی جی ڈیفنس ایکسپو میجر جنرل آغا مسعود اکرم نے کہا کہ ہم دفاعی سامان بنانے میں بتدریج بہتری لارہے ہیں۔انہوں نے نمائش میں شرکت کرنے والے ملکی اور غیر ملکی کمپنیوں، وفود اور خصوصی مہمانوں کا شکریہ ادا کیا۔ انہوں نے بتایا کہ نمائش میں 261 غیر ملکی ‘ 157 قومی کمپنیاں اپنے دفاعی مصنوعات پیش کررہی ہیں ان کا کہنا تھا کہ جے ایف 17 تھنڈر، کے 8 ایئرکرافٹ، الخالد ٹینک، فاسٹ اٹیک کرافٹ میزائل بوٹ اور دیگر دفاعی ساز و سامان پیش کیے جارہے ہیں۔چار روزہ نمائش کیلئے ملکی اور غیر ملکی سامان حرب و ضرب سجا دیا گیا جبکہ ترکی کے جدید طیارے اور ایئر ڈیفنس سسٹم بھی نمائش کو چار چاند لگا رہے ہیں اور روس کی تین کمپنیاں بھی جدید ترین اسلحے کے ساتھ موجود ہیں۔ذرائع نے بتایا ہے کہ روس کے ساتھ پاکستان کے ایم آئی 35ہیلی کاپٹرز سمیت متعدد دفاعی معاہدے طے پاچکے ہیں جن پرعملدرآمد جاری ہے جبکہ روس نے پاکستان کو اسلحہ کی فراہمی کی مزید پیشکشیں بھی کی ہیں۔