بیجنگ (آئی این پی ) گوادر بندر گاہ کی افتتاحی تقریب کو چینی ذرائع ابلاغ نے بھرپور کوریج دی ہے اور ا سے عشروں پر محیط چین پاکستان دفاعی حکمت عملی کے دیرینہ تعلقات میں اہم پیشرفت اور سنگ میل قراردیا ہے ،پاکستان کے صوبے بلوچستان کی اہم بندرگاہ گوادر کے افتتاح سے دونوں ملکوں کے درمیان تعلقات کے ایک نئے دور کا آغاز ہوا ہے ، اسے چین کے صدر شی جن پنگ کا وہ نظریہ مکمل ہورہا ہے جو انہوں نے چین پاکستان اقتصادی راہداری اور بیلٹ اینڈ روڈ منصوبے کی صورت میں پیش کیا تھا۔اطلاعات کے مطابق پاکستان میں چین کے سفیر سن و ی ڈونگ نے شمال سے جنوب کی جانب پاکستان کے مغربی حصے سے کامیابی کے ساتھ قافلے کا پہلی مرتبہ گوادر پہنچنے کو سراہا ہے۔ریڈیو پاکستان کے مطابق انہوں نے اس بات کا خاص طورپر ذکر کیا کہ یہ پہلا موقع ہے کہ مال بردارکنٹینروں کا قافلہ گوادر کی بندر گاہ سے مال برآمد کرنے کیلئے چین سے پہنچا ہے جس کا اہتمام چین اور پاکستان نے مشترکہ طورپر کیا تھا ۔چینی سفیر نے مزید کہا کہ چین پاکستان اقتصادی راہداری منصوبے کے تحت پہلا دوطرفہ مشترکہ تجارتی قافلہ کاشغر سے گوادر تک پہنچا ہے اور یہ دونوں ملکوں کے درمیان باہمی مشاورت، مشترکہ تعمیر ، مشترکہ فوائد،باہمی تعاون اور مشترکہ جذبے کی علامت ہے جو چین پاکستان اقتصادی راہداری منصوبے کی مستقبل میں تعمیر کیلئے ٹھوس بنیادیں فراہم کرتا ہے ، راہداری منصوبہ پر نمایاں پیشرفت کے ساتھ عمل کیا جارہا ہے اور اس کے تحت سولہ ایسے منصوبے مکمل کئے جا ر ہے ہیں جو بہت جلد عملی نتائج دینا شروع کر دیں گے جبکہ ان منصوبوں کی تکمیل سے مقامی لوگوں کیلئے روز گار کے لاکھو ں مواقع پیدا ہونگے ۔

موضوعات:چین گوادر پروجیکٹ