لاہور (آئی این پی) تحر یک انصاف کی رکن قومی اسمبلی ڈاکٹر شیریں مزاری نے کہا ہے کہ ہیلری کلنٹن جانی پہچانی شیطان ہیں اس لیے اگر وہ جیت بھی جائیں تو پاکستان کو اس بات کا کوئی فائدہ نہیں ہوگا۔ایک ٹی وی پروگرام میں گفتگو کرتے ہوئے ڈاکٹر شیر یں مزاری نے کہا کہ امریکی صدارتی انتخابات میں ہیلری جیتے یا ٹرمپ، پاکستان کو اس کا کچھ خاص فائدہ نہیں ہونے والا کیونکہ جب اوباما نے الیکشن لڑا تو ان کے بارے میں بھی کہا جاتا رہا کہ ان کی ماں پاکستان میں رہ چکی ہیں لیکن صدر منتخب ہونے کے بعد جتنا نقصان اوباما نے پاکستان کو پہنچایا اتنا کسی اور نے آج تک نہیں پہنچایا۔
انہوں نے کہا کہ ڈونلڈ ٹرمپ مسلمانوں اور مہاجرین کے خلاف شدت پسندانہ خیالات رکھتے ہیں لیکن ہیلری کلنٹن بھی کچھ کم نہیں ہیں۔ سب کو پتا ہے کہ موصوفہ کیا کچھ کر چکی ہیں۔ انہوں نے کہا کہ ہیلری کلنٹن جانی پہچانی شیطان ہیں اس لیے ان کے جیتنے پر کسی خوش فہمی میں نہیں رہنا چاہیے کیونکہ وہ بھی مسلمانوں اور پاکستان کے بارے میں کچھ خاص اچھے جذبات نہیں رکھتیں۔
