کراچی(این این آئی)کراچی کے علاقے ناظم آباد چار نمبر میں مجلس پر اندھادھندفائرنگ کے نتیجہ میں 4بھائیوں سمیت5 افراد جاں بحق جبکہ خواتین سمیت متعددافرادزخمی ہوگئے ہیں۔گورنرسندھ اوروزیراعلیٰ سندھ نے واقعہ کا نوٹس لے لیاہے۔واقعے کی ذمہ داری لشکرجھنگوی العالمی کے عافیہ صدیقی بریگیڈنے قبول کرلی ہے۔پولیس کے مطابق ناظم آباد نمبر چار کے علاقے میں مجلس عزا جاری تھی کہ نامعلوم موٹر سائیکل سوار مسلح افراد نے فائرنگ کردی۔ فائرنگ کا واقعہ کراچی کے علاقے ناظم آباد میں پیش آیا جہاں ایک گھر میں مجلس ہو رہی تھی۔ نامعلوم افراد نے گھر میں گھس کر وہاں موجود لوگوں پر اندھا دھند فائرنگ کر دی۔ فائرنگ کرنے والے نامعلوم دہشتگرد دو موٹر سائیکلوں پر سوار تھے۔ انہوں نے آتے ہی گولیاں چلانا شروع کر دیں جس سے پانچ افراد موقع پر جاں بحق ہو گئے۔ ان میں 4 افراد سگے بھائی بتائے جاتے ہیں۔ واقعے کی اطلاع ملتے ہی قانون نافذ کرنے والے اداروں کے اہلکار، رینجرز اور امدادی ٹیمیں جائے حادثہ پر پہنچ گئیں۔ امدادی ٹیموں نے ایمبیولینسوں کے ذریعے زخمی افراد کو عباسی شہید اسپتال منتقل کیا۔ اسپتال ذرائع کے مطابق زخمیوں میں سے دو کی حالت تشویشناک ہے۔ پولیس کے مطابق ابتدائی تحقیقات کے مطابق واقعہ ٹارگٹ کلنگ کا لگتا ہے۔ جائے حادثہ سے نائن ایم ایم پستول کے خول ملے ہیں۔ موٹر سائیکل سوار دہشتگرد فائرنگ کے بعد موقع واردات سے فرار ہونے میں کامیاب ہو گئے۔ پولیس نے علاقے کی ناکہ بندی کرکے تفتیش شروع کر دی ہے۔ گورنرسندھ اوروزیر اعلی سندھ سید مراد علی شاہ نے واقعے کا فوری نوٹس لیتے ہوئے اعلی حکام کو فوری طور پر رپورٹ پیش کرنے کا حکم دیا ہے۔دوسری جانب واقعے کی ذمہ داری لشکرجھنگوی العالمی کے عافیہ صدیقی بریگیڈنے قبول کرلی ہے۔

موضوعات:کراچی