اسلام آباد(آئی این پی )وزارت داخلہ کے ذرائع نے کہاہے کہ انگریز ی اخبار کے صحافی سیرل المیڈا کی اندرون ملک نقل وحرکت پر نہ توکوئی پابندی ہے اور نہ ہی ان کی نگرانی کی جا رہی ہے، ای سی ایل میں نام ان کی غلط ، من گھڑت اور گمراہ کن مواد پر مبنی رپورٹ کے خلاف تحقیقات کوجلد مکمل کرنے کے لئے شامل کیاگیا ۔ منگل کووزارت داخلہ ڈویژن کیذرائع نے قومی سلامتی کے حوالے سے متنازع رپورٹ شائع کرانے والے انگریزی اخبار کے صحافی سیرل المیڈا کے معاملے پر کہاہے کہ ان کا نام اس لئے ایگزٹ کنٹرول لسٹ( ای سی ایل) میں ڈالا گیا ہے تاکہ ان کی جانب سے تحریر کی گئی غلط ، من گھڑت اور گمراہ کن مواد پر مبنی رپورٹ کے خلاف تحقیقات کو جلد مکمل کیا جا سکے۔ ذرائع کے مطابق ملک کے اندر سیرل المیڈ اکی نقل وحرکت پر نہ تو پابندی ہے نہ اسے محدود کیا گیا ہے اور نہ ہی ان کی کڑی نگرانی کی جا رہی ہے ۔