کراچی(این این آئی) ہندو کمیونٹی نے محرم الحرام کے احترام میں مذہبی تہوار رام لیلا نہ منانے کا اعلان کیا ہے۔کراچی میں بسنے والی ہندو کمیونٹی کے مذہبی تہوار نوراتری کی تقریبات سوامی نرائن مندر میں منعقد ہونا تھیں لیکن ہندو برادری نے محرم الحرام کے احترام میں اپنے مذہبی تہوار نوراتری نہ منانے کا اعلان کیا ہے جب کہ رواں سال مذہبی کھیل رام لیلا بھی پیش نہیں کیا جائے گا۔اس ضمن میں سوامی نرائن مندر کے نائب صدر کرشن لعل نے کہاکہ ہندو برادری کی بڑی تعداد رام لیلا دیکھنے کے لیے مندر آتی ہے لیکن محرام الحرام کے موقع پر سیکورٹی کے سخت انتظامات کے باعث لوگوں کو آنے میں دقت پیش آئے گی لہذا ہم نے محرم الحرام کے احترام کے پیش نظر رام لیلا نہ پیش کرنے کا فیصلہ کیا ہے۔ انہوں نے کہا کہ مسلمان ہمارے بھائی ہیں اسی لیے ہم ان کا احترام کرتے ہیں اور وہ ہمارے تہواروں کا احترام کرتے ہیں لہذا اس سال راون کے پتلے کو بھی نذر آتش نہیں کیا جائے گا۔