اسلام آباد( مانیٹرنگ ڈیسک ) حکومت نے دہشت گردی کے خطرے کے پیش نظر 9 اور 10 محرم الحرام کو ملک بھر میں موبائل فون سروس بند رکھنے کا فیصلہ کیا ہے۔ نجی ٹی وی کے مطابق وفاقی حکومت نے سکیورٹی خدشات کے پیش نظر 9 اور 10 محرم الحرام کو ملک بھر میں موبائل فون سروس معطل رکھنے کا فیصلہ کیا ہے۔ ذرائع کا کہنا ہے موبائل فون سروس بند رکھنے کا فیصلہ صوبائی حکومتوں اور سکیورٹی اداروں کی درخواست پر کیا گیا۔ذرائع کے مطابق موبائل فون سروس جلوسوں کے روٹس پر بند رہے گی اور موبائل فون سروس جلوسوں کے اختتام تک معطل رہے گی۔
دوسری جانب جمعیت علماء پاکستان نورانی کے مرکزی نائب صدر صاحبزادہ حامد محمود فیضی نے کہا ہے کہ محرم الحرام کے دوران امن بھائی چارے اور رواداری کو فروغ دینے کی بہت ضرورت ہے تاکہ اسلام دشمن طاغوتی قوتوں کے مکروہ عزائم کو خاک میں ملایا جاسکے امت مسلمہ حضرت عمر فاروق ؓ اور حضرت امام حسین ؓ سے والہانہ عقیدت و محبت رکھتے ہیں اور علماء کرام پر بھاری ذمہ داری عائد ہوتی ہے کہ وہ انتشار پھیلانے والے ملک دشمن عناصر پر کڑی نظر رکھیں ان خیالات کا اظہار انہوں نے جے یو پی ضلع سکھر کے صدر محمد لطیف مغل کی قیادت میں ملاقات کرنے والے وفد سے بات چیت کرتے ہوئے کیا صاحبزادہ حامد محمود فیضی نے مزید کہا ہے کہ ماہ محرم الحرام اسلامی اقدار کا آئینہ دار ہے جس کی ابتدا اور انتہا بے مثال قربانیوں سے عبارت ہے اس ماہ مبارک میں خلیفہ دوئم حضرت سیدنا عمر فاروق اور سید الشہداء حضرت امام حسین ؓ کی شہادت میدان کربلا کا واقعہ حق اور باطل کے درمیان مارکہ تھا امام حسین نے میدان کربلا میں اپنی اوررفقا کی جانوںکو نذرانہ دیکر دین اسلام کے پرچم کو بلند کیا انہوں نے کہا ہے محرم الحرام میں آپس میں ہم آہنگی کو فروغ دیکر فساد پھیلانے والوں کی سازش کو ناکام بنایا جاسکتا ہے علماء کرام شہری مذہبی ہم آہنگی کے فروغ کے لئے اپنا کردار ادا کریں ۔

موضوعات:محرم الحرام موبائل فون