لاہور( این این آئی)صوبائی وزیر قانون رانا ثنا اللہ خان نے کہا ہے کہ پنڈی والاصاحب عمران خان سے دوستی نہیں دشمنی نبھا رہا ہے ،صرف ایک نشست رکھنے والاشر پسند عمران خان کو آئندہ عام انتخابات میں ایک نشست کے قابل بھی نہیں چھوڑے گا ،محرم الحرام کے موقع پر فول پروف سکیورٹی کیلئے ہوم ورک مکمل کرلیا ہے ،اے کیٹگری کے جلوسوں اور مجالس کو تھری لیئر سکیورٹی فراہم کی جائے گی ۔ ایک انٹر ویو میں رانا ثنا اللہ خان نے کہا کہ بد قسمتی سے عمران خان کی اپنی کوئی سوچ نہیں وہ جس کی پٹی پڑھ رہے ہیں جلد ان کی سیاست کا مکمل ستیا ناس ہو جائے گا ۔ انہوں نے کہا کہ دشمن سرحدوں پر اشتعال انگیزی کر رہا ہے اور ایسے موقع پر جب قومی یکجہتی کی ضرورت ہے عمران خان نے اپنا ڈرامہ شروع کر دیا ہے ان کے اس اقدام کو کس کی مدد کہا جائے ۔ لاہور کی عوام نے عمران خان کی آتشزدگی سے بھرپور سیاست کو مسترد کر دیا ہے ۔پی ٹی آئی کی قیادت نے عوام کے تیور دیکھتے ہوئے آئندہ جلسے نہ کرنے کا درست فیصلہ کیا ہے ۔ عمران خان کو مفت مشورہ ہے کہ شر پسند کے پیچھے لگ کر اپنی سیاست کا ستیا ناس نہ کریں ۔ پنڈی والاصاحب عمران خان سے دوستی نہیں دشمنی نبھا رہا ہے اور ان کے کندھوں پر رکھ کر بندوق چلانا چاہتے ہیں،اگر عمران خان اسی طرح اپنا کندھا فراہم کرتے رہے تو آئندہ عام انتخابات میں ایک نشست کے قابل بھی نہیں رہیں گے ۔ انہوں نے کہا کہ ہم چاہتے ہیں کہ پیپلز پارٹی کے مقابلے سے باہر ہونے کے بعد پی ٹی آئی ہمارے مقابلے پر رہے لیکن اپنی بیوقوفیوں سے خود مقابلے سے باہر ہو رہے ہیں۔انہوں نے کہا کہ محرم الحرام میں پاک فوج اور رینجرز کی 82کمپنیوں کو ریکوزیشن کریں گے جو کسی بھی نا خوشگوار واقعہ کی صورت میں پولیس اور انتظامیہ کی مدد کے لئے دستیاب ہوں گی ۔محرم الحرام میں مجموعی جلوسوں اور مجالس میں سے حساس کا اعدادوشمار مرتب کر لئے ہیں اور ان جلوسوں اور مجالس کو تھری لیئر سکیورٹی فراہم کی جائے گی۔