پشاور(این این آئی)خیبرپختونخواحکومت کی جانب سے عو ام کوتفریح کے مواقع فراہم کرنے کی غرض سے صوبے میں تعمیر ہونے والی پہلی فوڈسٹریٹ کی تکمیل آخری مراحل میں داخل ہوچکی ہے جس کا افتتاح عیدالاضحی کے فوری بعد وزیر اعلیٰ پرویزخٹک کرینگے اور اسے عوام الناس کے لئے کھول دیا جائے گا۔صو بائی دارالحکومت پشاور کے علاقہ حیات آباد فیز6میں پشاور ڈیویلپمنٹ اتھارٹی (پی ڈی اے ) کی نگرانی میں تقریباً 20کنال کمرشل اراضی پر صوبے کی پہلی فوڈسٹریٹ تعمیر کی جارہی ہے جہاں فاسٹ فوڈ سمیت کھانے پینے کے معیاری اور بین الاقوامی برانڈکے ابتدائی طورپر26پوائنٹس کھولے جارہے ہیں جن سے عوام الناس کو تفریحی ماحول کی دستیابی کے ساتھ ساتھ حفظان صحت کے عین اصولوں کے مطابق کھانے پینے کی اشیاء ایک ہی مقام پر میسر آئیں گی ۔پشاور فوڈ سٹریٹ کی تعمیرکاکام ملک کی بین الاقوامی تعمیراتی کمپنی فرنٹیئرورکس آرگنائزیشن(ایف ڈبلیواو) کررہی ہے۔پشاورفوڈ سٹریٹ میں بین الاقوامی معیار کے مطابق بڑے بڑے فوڈ پوئنٹس تعمیر کئے گئے ہیں جہاں عوام کے بیٹھنے اور گاڑیوں کی پارکنگ کے لئے خصوصی انتظامات کئے گئے ہیں۔ پشاور فوڈ سٹریٹ کے تعمیراتی کام کا جائزہ لینے کے لئے ڈائریکٹرجنرل پی ڈی اے سلیم وٹونے فوڈسٹریٹ کا دورہ کیا اورمنصوبے پر جاری کام کی رفتارپر اطمینان کا اظہار کرتے ہوئے کہا کہ صوبے میں تعمیر ہونے والی پشاور فوڈ سٹریٹ کاکام جلد مکمل کرلیا جائے گااوراسے عوام کی تفریح کے عیدالاضحی کے فوری بعد کھول دیا جائے گا۔انہوں نے کہا کہ فوڈ سٹریٹ میں تعمیر ہونے والے تمام فوڈ پوائٹس کوبذریعہ اوپن آکشن کے شفاف انداز میں دیا جائے گا۔