اسلام آباد(مانیٹرنگ ڈیسک) نجی ٹی وی پروگرام میں سینئر سیاستدان و معروف مذہبی رہنماء ڈاکٹر طاہر القادری نے تہلکہ خیز انکشافات کر دیئے۔ نجی ٹی وی پروگرام میں گفتگو کرتے ہوئے پاکستان عوامی تحریک کے سربراہ نے کہا کہ ماڈل ٹاؤن سانحے میں بے گناہوں کو شہید کرنے والے پولیس اہلکاروں کے ایک وفد نے ان سے رابطہ کیا ہے۔ پنجاب حکومت کو یہی ڈر ہے کہ اگر ایک بھی شخص گرفتار ہوا تو وہ وعدہ معاف گواہ بن جائیگا۔ طاہر القادری نے کہا کہ کچھ اعلیٰ پولیس افسران نے ہمارے لوگوں سے رابطہ بھی کیا ہے کہ ہم گواہی دینے کو تیار ہیں ، ہمیں وعدہ معاف گواہ بنا لیں ۔
طاہر القادری نے کہا کہ مجھ سے پوچھا گیا تو میں نے اپنی مقامی قیادت سے کہا کہ ان پولیس والوں سے کہیں کہ پہلے آپ کو گواہی دینی ہوگی۔ اس کے بعد اگلی بات ہوگی اور قانون کے مطابق جو بھی ممکن ہوگا اس پر غور کیا جائے گا۔ طاہر القادری نے کہا کہ وہ انتظار میں بیٹھے ہیں کہ جس پر ہاتھ ڈالیں گے ، قانون کے مطابق، انصاف کے مطابق جس کو گرفتار کریں گے وہی وعدہ معاف گواہ بنے گا۔