اسلام آباد (آئی این پی) سرکاری ملازمین کی تنخواہوں میں اضافے کا نوٹیفیکیشن جاری کر دیا گیا ، تنخواہوں میں مجموعی طور پر تیرہ فیصد اضافہ کیا گیا ۔ وزارت خزانہ کی جانب سے جاری نوٹیفیکیشن کے مطابق گریڈ ایک کے ملازم کی کم سے کم تنخواہ 12 ہزار 600 جبکہ زیادہ سے زیادہ 14 ہزار 800 روپے ہو گئی ۔میڈیا رپورٹس کے مطابق گریڈ 22 کے افسر کی کم سے کم تنخواہ ایک لاکھ 11 ہزار جبکہ زیادہ سے زیادہ 1 لاکھ چھتیس ہزار ہوگئی ۔ نوٹیفکیشن کے مطابق سرکاری ملازمین کی بنیادی تنخواہ میں تین ایڈہاک ریلیف بھی ضم کیے گئے ہیں۔ دو ہزار تیرہ ، چودہ اور پندرہ کے ایڈہاک ریلیف تنخواہوں کا حصہ بن گئے ہیں۔ سرکاری ملازمین کی تنخواہوں میں مجموعی طور پر تیرہ فیصد اضافہ کیا گیا ہے جس میں سے دس فیصد سالانہ اور ایڈہاک ریلیف ضم کرنے سے 3 فیصد اضافہ شامل ہے۔