اسلام آباد (این این آئی) پاناما لیکس کی تحقیقات کیلئے ٹی او آر کی تیاری پر حکومت اور اپوزیشن میں کشیدگی برقرار ہے ٗمتحدہ اپوزیشن نے اعلان کیا ہے کہ پیرکوعوام کواعتمادمیں لیں گے۔ جمعہ کو اپوزیشن رہنماوں کا ٹی اوآرز سے متعلق مشاورتی اجلاس اپوزیشن لیڈر خورشید شاہ کی صدارت میں ہوا ۔ اجلاس میں گفتگو کرتے ہوئے خورشید شاہ نے کہاکہ پیر کے روز ٹی اوآرز پرقوم کو اپنے اور حکومت کے موقف سے آگاہ کریں گے، پریس کانفرنس میں ٹی اوآرز کمیٹی میں اپوزیشن کے تمام ارکان شریک ہوں گے ۔اعتزاز احسن نے کہاکہ وزیر اعظم باربار اپنے احتساب کا کہتے ہیں ان کا موقف ہے کہ چھپانے کو کچھ نہیں، تاہم حکومت معاملے کو التواء میں ڈالنے کے لئے تاخیری حربے استعمال کررہی ہے۔ لگتا ہے کہ وزیر اعظم کے درباری انہیں بچانا چاہتے ہیں اس تمام صورتحال پر بہت تشویش ہے۔اس موقع پر گفتگو کرتے ہوئے شاہ محمود قریشی نے کہا کہ کمیٹی میں نمائندگی نہ رکھنے والی جماعتوں کے رہنماؤں کو بھی اپوزیشن اجلاس میں دعوت دی گئی اور سب کو اعتماد میں لیا ہے۔ ہم نے اجلاس میں مایوسی کا اظہار کیا اورحکومت کے منفی رویئے پر اجلاس کے شرکاء کو آگاہ کیا ۔ انہوں نے کہا کہ ہماراموقف بہت معقول ہے پیر کے روز قوم کو اپنے موقف سے آگاہ کریں گے۔ اجلاس میں شاہ محمود قریشی ،اعتزاز احسن، خالد مقبول صدیقی، صاحبزادہ طارق اللہ، شیخ رشید اور اسرار زہری شریک ہوئے۔ میڈیا سے گفتگو کرتے ہوئے اعتزازاحسن نے کہا کہ وزیر اعظم کو احتساب سے انکار نہیں تاہم چند درباری انہیں ایسا نہیں کرنے دے رہے۔خورشید شاہ نے کہاکہ بس اب بہت ہوگیا عوام کو سب بتادیں گے ٗسوموار کو اعتزاز کے گھر پرپریس کانفرنس کریں گے۔اجلاس میں خورشید شاہ کاکہناتھاکہ اگر اپوزیشن نے اکٹھے چلنا ہے تو عمران خان اگست میں اکیلے لانگ مارچ یا دھرنے کا اعلان کیسے کرسکتے ہیں؟شاہ محمود قریشی نے یقین دہانی کرائی کہ سولو فلائٹ کی بجائے اپوزیشن جماعتوں کوساتھ لے کرچلیں گے۔